پشتى كۆ سپێده‌هیا ئه‌ڤرۆ رۆژا چارشه‌مبى، د.عه‌لى ته‌ته‌ر نێروه‌ى، پارێزگارێ دهۆكێ سه‌ره‌دانا هه‌ردوو قه‌زایێن ئاكرێ و به‌رده‌ره‌ش كرى و دگه‌ل لایه‌نێن كارگێرى یێن هه‌ردوو قه‌زایان كۆمبوى، د كۆنگره‌یه‌كێ رۆژنامه‌ڤانى دا پارێزگارێ دهۆكێ دۆپاتى ل وێ چه‌ندێ كر كۆ ئه‌گه‌ر ره‌وش ب ڤى ره‌نگى بیت و مه‌ترسى به‌رده‌وام بیت، دێ قه‌ده‌غه‌یا هاتن و چوونێ هێته راگه‌هاندن. د.عه‌لى ته‌ته‌ر نێروه‌ى، پارێزگارێ دهۆكێ د كۆنگره‌یێ رۆژنامه‌ڤانى دا دیاركر:” نه‌خۆشیا په‌تایا كۆرۆنایێ ل جهیان و كوردستانێ به‌ره‌ڤ زێده‌بوونێ ڤه دچیت و ئه‌ڤ چه‌نده مه‌ترسیه‌ك مه‌زنه ل سه‌ر ژیانا مرۆڤایه‌تیێ و ژ هه‌مى خه‌لكێ خۆشتڤى دخازین د هاریكار بن بۆ به‌رهنگاربوونا په‌تایا كۆرۆنایێ، چونكه كۆرۆنا یارى نینه و هیڤیه خه‌لك یاریێ ب په‌تایا كۆرۆنایێ نه‌كه‌ت”. پارێزگارێ دهۆكێ دۆپاتى ل وێ چه‌ندێ ژى كر: ” دڤێت رێنمایێن خۆپاراستێ بهێنه جێبه‌جێكرن و هه‌ر كه‌سێ پێگیریێ ب رێنمایان نه‌كه‌ت لدویڤ یاسایێ دێ پێرابون لسه‌ر هێنه جێبه‌جێكرن و هه‌ر ب مه‌ره‌ما پاراستنا گیانێ خه‌لكێ هه‌رێمێ، لدیڤ بریارێن وه‌زاره‌تا ناڤخو یا حكۆمه‌تا هه‌رێما كوردستانێ، بۆ قۆناغا ئێكێ بۆ ده‌مێ(7) رۆژان ب چ ره‌نگه‌كێ كه‌س ژ پارێزگه‌هێن عیراقێ ناهێته ناڤا پارێزگه‌هێن هه‌رێمێ دا و چوون بۆ وان پارێزگه‌هان دێ هه‌بیت لێ هاتن نینه و پاشان دێ ته‌ماشه‌ى ره‌وشێ كه‌ین ئه‌گه‌ر باشتر بوو، دێ وه‌ك به‌رى نها ئاسایى بیت لێ ئه‌گه‌ر ره‌وش ب ڤى ره‌نگى بیت دێ نه‌چار بین قه‌ده‌غه‌یا هاتن و چوونێ رابگه‌هینین و دێ هه‌مو رێكه‌كێ گرینه به‌ر بۆ به‌رژه‌وه‌ندیا خه‌لكێ مه دا”. د.عه‌لى ته‌ته‌ر نێروه‌ى، پارێزگارێ دهۆكێ ئه‌و چه‌نده ژى گۆت:” هه‌ر ژ پێخه‌مه‌ت پاراستنا گیانێ خه‌لكێ پارێزگه‌ها دهۆكێ، ده‌واما فه‌رمى ل فه‌رمانگه‌هێن حكۆمى و حزبى بۆ ده‌مێ(7) رۆژان تا رێكه‌فتى 15/8/2020 هاتنه راوه‌ستاندن و مه‌ره‌ما مه ئه‌و چه‌نده بوویه خه‌لكێ مه بێ كار ل مال ده‌رنه‌كه‌ڤیت و ئه‌گه‌ر خه‌لك پابه‌ند نه‌بیت دێ نه‌چار بین بریارێن توندر ده‌ركه‌ین و هیڤیه خه‌لكێ مه ل پارێزگه‌ها دهۆكێ پێگیریێ ب رێنمایان بكه‌ت چونكه پێگریا خه‌لكى ب رێنمایێن حكۆمه‌تێ، ئه‌گه‌ره‌ك بهێزه ئه‌ڤ په‌تایا كۆرۆنایێ گه‌شه‌یێ نه‌كه‌ت و ژخۆدێ دخازین هه‌مو كه‌سێن تۆشبویێن په‌تایا كۆرۆنایێ ب زۆترین ده‌م ره‌وشا وان باش ببیت و ژ ئه‌ڤێ په‌تایێ دوماهى بهێن”. جهێ ئاماژه‌پێدانێ یه، ل پارێزگه‌ها دهۆكێ تا نۆكه 801 كه‌س تۆشى په‌تایا كۆرۆنایێ بوونه و 387 كه‌س چاره‌سه‌ر بوونه و 6 كه‌س ب كۆرۆنایێ گیانێ خۆ ژ ده‌ست دایه و 408 كه‌س ژى ل ناڤا نه‌خۆشخانێن كۆرۆنایێ دا مانه و چارسه‌ریان وه‌ردگرن.
پارێزگارێ دهۆكێ: ئه‌گه‌ر ره‌وش ب ڤى ره‌نگى بیت دێ قه‌ده‌غه‌یێ راگه‌هینین
