لدۆر هه‌بوون و نه‌بوونا ئۆكسجینێ بۆ نه‌خۆشخانێن دهۆكێ، رێڤه‌به‌ریا گشتى یا ساخله‌میا پارێزگه‌ها دهۆكێ دوپاتی ل وێ چه‌ندێ دكه‌ت كۆ ئه‌وان چ كێشه‌یێن كێمیا ئۆكسجینێ نینن. حه‌مزه ره‌زیكى، په‌یڤدارێ رێڤه‌به‌ریا گشتى یا ساخله‌میا پارێزگه‌ها دهۆكێ داخویانیه‌كێ دا بۆ (باسنیوز) گۆت: “ژ به‌ر كۆ، مه 3 نه‌خۆشخانێن تایبه‌ت یێن چاره‌سه‌ركرنا نه‌خۆشێن په‌تایا كۆرۆنایێ ل دهۆكێ هه‌نه و هه‌لبه‌ت ئه‌وان نه‌خۆشخانه‌یان هه‌رده‌م پێتڤى ب ئۆكسجینێ هه‌یه و ژ بۆ وێ چه‌ندێ كۆ كێشه‌یا كێمیا ئۆكسجینێ ل نه‌خۆشخانێن مه دروست نه‌بیت، بریار هاتیه دان ل ده‌مێ حه‌فتیا بهێت دا كارگه‌هێن به‌رهه‌مئینانا ئۆكسجینێ بۆ وان نه‌خۆشخانان بهێنه درۆستكرن”. په‌یڤدارێ رێڤه‌به‌ریا گشتى یا ساخله‌میا پارێزگه‌ها دهۆكێ ب رێكا (باسنیوز) ئاماژه ب وێ چه‌ندێ ژى دا: “د هه‌مان ده‌م دا كۆ نه‌خۆشخانا هیڤى یا زارۆكان به‌رى نها كارگه‌هه‌كا ئۆكسجینێ بۆ هاتبوو دروستكرن لێ ژ پێخه‌مه‌ت وێ چه‌ندێ پێتڤیا زێده‌تر بهێت پر كرن و ئه‌وێ نه‌خۆشخانێ پتر پێتڤى ب ئۆكسجینێ هه‌یه، له‌ورا بریار هاتیه دان كارگه‌هه‌كا دیتر ژى یا به‌رهه‌م ئینانا ئۆكسجینێ بۆ نه‌خۆشخانا هیڤى یا زارۆكان بهێته درۆستكرن و دوپاتیێ ل وێ چه‌ندێ ژى دكه‌ین كۆ ل زاخۆ ژى دێ كارگه‌ها دروستكرنا ئۆكسجینێ شیانێن وێ زێده‌تر بن بۆ دروستكرنا ئۆكسجینێ و ب هه‌مى شیان ڤه دێ كار كه‌ین تا كۆ كێشه‌یا كێمیا ئۆكسجینێ ل نه‌خۆشخانێن مه سه‌رهه‌ل نه‌ده‌ن”.
ساخله‌میا دهۆكێ: مه كێشا ئۆكسجینێ نینه
