وەكو ئەڤرۆ سالا 2014ێ خەلكێ گوندێ كۆچۆ دووراتیا 35 كم ل شنگال ب دەستێ ترۆرستێن داعش هاتنە جینوسایدكرن. كچی عەمۆ، ئێك ژ رزگاربوویێن جینوسایدا گوندێ كۆچو بۆ (باسنیوز) دیار كر كو تیرۆرستێن داعش بۆ دەمێ 12 رۆژان گوندێ كۆچۆ دوورپێچكرن پشتی هینگی ئەم برینە قوتابخانا گوندێ كۆچۆدا خەلكێ پێكهاتی بوون ژ 1700 كەسان هەموو هاتنە كۆمكرن دناڤ قوتابخانا گوندێدا. تیرۆرستێن داعش دناڤ 11 گۆرێن بكۆمدا خەلكێ گوندێ گولەبارانكرن و 517 كەس شەهیدكرن. هەتا نۆكە 10 گۆرێن بكۆم یێن هاتینە ڤەكرن لێ هیشتا بەغدا روفات رادەستی كەسوكارێن قوربانیان نەكرینە”. كچی عەمۆ گۆتژی: وەكو ئەڤرۆ 15/8/2014ێ تیرۆستێن داعش خەلكێ كۆچۆ تووشی جینوسایدێ كرن و بتنێ 19 كەس ئێزدی ژ ناڤ گۆرێن ب كۆم رزگاربووینە. نۆكە ل كۆچۆ 517 گۆر بۆ ڤەشارتنا روفاتێن قوربانیێن كارەساتا گوندێ كۆچۆ یێن هاتینە دروستكرن. ئەم هیڤیدارن بەغدا روفاتێن قوربانیان رادستی مە بكەت و هەڤكاریا خەلكێ بكەت”. مەحما خەلیل، قایمقامێ قەزا شنگال بۆ (باسنیوز) دیار كر كو كارەسات دووڤ كارەساتێ ب سەرێ ئێزدیان هاتیە. ئەم داخوازێ دكەین كوشتنا ئێزدیان بهێتە حەرامكرن داكو خەلكێ مە بشێن ڤەگەرنە شنگال. هەتا نۆكە 80% خەلكێ شنگال ئاوارانە ژبەر ڤان كارەسات و مالۆیرانیێ نەشێن ڤەگەرن. پێدڤیە حكومەتا عێراقێ دووڤ منكوبیە شنگال و گوند و كۆمەلگەه و ناحیێن سەر شنگال ڤە قەرەبوویا خەلكێ بكەت وكچ وژن و زارۆیێن ئێزدی ژبن دەستێ تیرۆرستێن داعش رزگار بكەت”. ئاشكەرا كر كو ئەڤە شەش سال بسەر فەرمانا شنگال ڤە چوون هێشتا تشتەك بۆ شنگال نەهاتیە كرن. هێشتا گوند و دەڤەرێن شنگال وێرانكرینە.
ئەڤرۆ سالڤەگەرا كارەساتا گوندێ كۆچۆیە
