لە كەركووك بەهۆی تەقینەوەی بۆمبێكی چێندراو پێنج كەس برینداربوون

بەڕێوەبەری پۆلیسی فریاكەوتنی كەركووك ڕایگەیاند، کە بەهۆی تەقینەوەی بۆمبێكی چێندراو لە شاری كەركووك پێنج كەس برینداربوون. عەقید مازن غەریب، بەڕێوەبەری پۆلیسی فریاكەوتنی كەركووك، بە (باسنیوز)ی ڕاگەیاند: “ئێوارەی ئەمڕۆ یەكشەممە 23ی8ی2020، لەگەڕەكی ڕاپەرین (قادسییە)ی شاری كەركووك، لەناو یەكێك لە خێوەتی شیعەكان كە بەهۆی مانگی موحەڕەمەوە ئەو خێوەتەیان دانابوو، بۆمبێكی چێندراو تەقیەوە”. گوتیشی: “لە ئەنجامدا پێنج هاووڵاتیی برینداربوون و پۆلیسیش لە بارەی ئەو تەقینەوە دەستی بە لێكۆڵینەوە كردووە”.