به‌رپرسێ راگه‌هاندنێ ل رێڤه‌به‌ریا گشتى ساخله‌میا پارێزگه‌ها دهۆكێ دیاركركو رۆژ دووڤ رۆژى هژمارا چاره‌سه‌ربوویێن كۆرۆنایێ ل پارێزگه‌ها دهۆكێ به‌ره‌ڤ زێده‌بوونێ دچێت. حه‌مزه ره‌زیكى، به‌رپرسێ راگه‌هاندنێ ل رێڤه‌به‌ریا گشتى ساخله‌میا پارێزگه‌ها دهۆكێ بۆ (باسنیوز) دیاركركو: “هژمارا چاره‌سه‌ربوویێن نه‌خۆشیا كۆرۆنایێ یا زێده‌بیت. بتنێ دوو رۆژێن بۆریدا ل دهۆكێ 464 تووشبوویێن كۆرۆنایێ چاره‌سه‌ربووینه. دهه‌مبه‌ر ژى دا 197 تووشبوویێن كۆرۆنایێ یێن هاتینه تۆماركرن و10 تووشبوویان دوو رۆژاندا گیانێ خۆ ژده‌ستدایه. لێ رێژا چاره‌سه‌ربوویێن كۆرۆنایێ بلندبوویه. چه‌ند وه‌لاتی هه‌ڤكاربن دێ رێژا تووشبوویان كێمتر بیت و دێ چاره‌سه‌ربوو ژى زێده‌تر بن. له‌ورا هیڤدارین وه‌لاتی بێ ماسك و ده‌ستكێش ژمال نه ده‌رنەكه‌ڤن”. ئاشكه‌را كركو: “ل پارێزگه‌ها دهۆكێ هه‌تا ئه‌ڤرۆ زێده‌تر ژ 3600 تووشبوویێن كورۆنایێ یێن هاتینه تۆماركرن. ژوانا ژى 1445 تووشبوویێن كۆرۆنایێ چاره‌سه‌ربووینه. دماوێ دوو رۆژێن بۆریدا رێژا چاره‌سه‌ربوویێن كۆرۆنایێ زێده‌بوویه. هه‌تا نۆكه 2126 تووشبوویێن كۆرۆنایێ ل ژێر چاره‌سه‌ریێ دانه. ل نه‌خۆشخانه‌یان ودناڤ ئوتێلان دا و هنده‌ك ژى مالێن خۆ چاره‌سه‌ری وه‌ردگرن و41 تووشبوویان ژى گیانێ خۆ ژده‌ستداینه”. ره‌زیكى بۆ (باسنیوز) گۆتژى: “نۆكه ل دهۆكێ پلازما خوینێ بۆ چاره‌سه‌ركرنا تووشبوویێن كۆرۆنایێ دهێته بكارئێنان له‌ورا داخوازێ ژ وان كه‌سان دكه‌ین یێن تووشبوویێ كۆرۆنایێ بووین هاتینه چاره‌سه‌ركرن، قه‌ستا به‌نكا خوینێ بكه‌ن بۆ پێشكێشكرنا پلازما خوینێ. هه‌ر تووشبوویه‌ك ژ كۆرۆنایێ چاره‌سه‌ربوویێ پشتى 14 رۆژان دشێت پلازما خوینێ ببه‌خشیت”.
دھۆك.. هژمارا چاره‌سه‌ربوویێن كۆرۆنایێ زێدە دبە
