بەگوێرەی چەند سەرچاوەیەکی حکوومەتی عێراق، پێشبینی دەکرێت ئیمانوێل ماکرۆن، سەرۆکی فەرەنسا، دوای سەردانی لوبنان، رۆژی چوارشەمەی داهاتوو سەردانی عێراق بکات. سەرچاوەکان بۆ ئاژانسی (فرانس پرێس) رایان گەیاندووە، سەرۆکی فەرنسا چوارشەمەی داهاتوو یەکەم سەردانی فەرمیی خۆی بۆ عێراق دەکات. هەر بەگوێرەی سەرچاوەکان، ئەم سەردانەی سەرۆکی فەرەنسا گوزارشتە لە وەستانیان شانبەشان عێراق بەڕووی ئەو تەنگژانەی، کە رووبەڕووی بوونەتەوە. لەو کاتەوە کە مستەفا کازمی سەرۆکایەتیی حکوومەتی عێراقی گرتووەتە دەست، ئەم سەردانەی ماکرۆن بە یەکەم سەردانی گەورە بەرپرسێک بۆ عێراق دادەنرێت. ئەگەرچی تا ئێستا کۆشکی ئێلیزێ هەواڵەکەی پشتڕاست نەکردووەتەوە، بەڵام سەرچاوەیەک لە حکوومەتی عێراق بە (فرانس پرێس)ی راگەیاندووە، کە “سەرۆک ماکرۆن لە سەردانەکەیدا چاوی بە مستەفا کازمی، سەرۆکوەزیرانی عێراق دەکەوێت، پێشبینیش دەکرێ گفتوگۆ لەگەڵ بەرپرسە باڵا و کارکاندا بکات. هەرچەندە هێشتا نازاندرێت ئاخۆ ماكرۆن سەردانی هەولێریش دەكات یان نا، بەڵام فەڕەنسا و سەرۆكەكەی پەیوەندییەكی بەهێزیان لەگەڵ هەرێمی كوردستان و سەركردایەتیی سیاسیی كورد هەیە.
لە دوای لوبنان ماکرۆن سەردانی عێراقیش دەکات
