ژمارەی کوژراوانی هێرشەکەی ئیسرائیل بۆ سەر میلیشیاکانی سەر بە ئێران بەرز دەبێتەوە

ژمارەی کوژراوانی هێرشەکەی ئیسرائیل بۆ سەر گرووپە چەکدارییەکانی سەر بە ئێران، بەرز دەبێتەوە. درەنگانی شەوی دووشەممە 31-8-2020، سوپای ئیسرائیل چەند بنکە و بارەگایەکی سەربازی لە باشووری دیمەشقی پایتەختی سووریا، تۆپباران کرد. ئەوکات راگەیاندرا، کە بەهۆی هێرشە مووشەکییەکەوە، دوو کەس گیانیان لەدەست داوە و حەوت کەسی دیکەش بریندار بوون. ئەمڕۆ سێشەممە 1-9-2020، رووانگەی سووری بۆ مافەکانی مرۆڤ بڵاوی کردووەتەوە، کە لە ئەنجامی ئەو هێرشەی سوپای ئیسرائیلدا، 11 کەس گیانیان لەدەست داوە. هەروەک رووانگەی سووری بۆ مافەکانی مرۆڤ رایگەیاندووە، یەکێک لە کوژراوەکان ژنێکی مەدەنی بووە، سێ کەسیشیان سەربازی رژێمی سووریا بوون و حەوت کەسەکەی دیکەش چەکداری میلیشیا و گرووپە چەکدارییەکانی سەر بە ئێران بوون.