رۆحانی: ئەمریکا هەمان هەڵەی سەدام حوسێن دووبارە دەکاتەوە

سەرکۆماری ئێران رایدەگەیەنێت،کە ئەمریکا هەمان هەڵەی سەرۆکی رژێمی بەعسی عێراقی، دووبارە دەکاتەوە. حەسەن رۆحانی، سەرکۆماری ئێران لە کۆبوونەوەیەکی حکوومەتی وڵاتەکەی، رایگەیاندووە، سەدام حوسێنی سەرۆکی رژێمی بەعسی عێراق (1979 – 2003)، لە ساڵانی (1980 – 1988) بە پاڵپشتیی نێودەوڵەتی، شەڕی لە دژی ئێران بەرپاکرد. حەسەن رۆحانی پێیوایە هەڵسەنگاندنەکانی سەدام حوسێن بەرامبەر ئێران هەڵە بوون و بوونە هۆی دروستبوونی کێشەی گەورە لە عێراق و سەرەنجام رووخانی رژێمەکەی. سەرکۆماری ئێران ئاماژەی بەوەش کردووە، کە ئێستا ئەمریکا هەمان هەڵەی سەدام حوسێن بەرامبەر ئێران بە سەپاندنی گەمارۆ و شەڕی ئابووری دووبارە دەکاتەوە، ”دوو ساڵ و شەش مانگە ئەمریکا شەڕی ئابووری دژی ئێران هەڵگیرساندووە“.