سەبارەت بە دامەزراندنی 500 خۆبەخشەکەی تەندروستی روونکردنەوە دەدرێ

بەرپرسێکی وەزارەتی تەندروستیی حکوومەتی هەرێمی کوردستان ئاشکرای دەکات کە ئەم هەفتەیە ڕێنمایی بۆ دامەزراندنی 500 خۆبەخشی تەندروستی دەردەچێت و خۆبەخشانی تەندروستیش دەتوانن فۆڕمەکە پڕ بکەنەوە. د. خالس قادر، بەڕێوەبەری گشتیی دیوانی وەزارەتی تەندروستی حکوومەتی هەرێمی کوردستان، بە (باسنیوز)ی ڕاگەیاند: “ئەم هەفتەیە ڕێنمایی لەبارەی دامەزراندنی ئەو 500 کەسە دەردەچێت کە لە لایەن سەرۆکی حکوومەتی ھەرێمی کوردستانەوە فەرمانی دامەزراندنیان بۆ دەرچووە و بەگوێرەی ڕێنماییەکان، دەرچووانی هەردوو بەشی پەرستاریی زانکۆ و بەشی سڕکردن دەتوانن فۆڕمی دامەزراندن پڕبکەنەوە و ئەو کەسانە لەسەر ئاستی هەموو پارێزگاکانی کوردستان دەست بەکار دەبن”. گوتیشی: “ئەو 500 کەسەی کە دادەمەزرێن لە لایەن حکوومەتی هەرێمی کوردستانەوە پارەیان بۆ دابین دەکرێت و ئەو کەسانە تەنیا بۆ ماوەی شەش مانگ لە سەنتەرەکانی تایبەت بە پەتای کۆڕۆنا خزمەتی هاووڵاتیان دەکەن و بە دامەزراندنیان سوودی زۆریان دەبێت بۆ وەزارەتی تەندروستی و ئەو بۆشاییە پڕ دەکەنەوە کە وەزارەتی تەندروستی هەیبوو لە کەمیی ژمارەی پزیشک و پەرستار”. ئەو بەرپرسەی وەزارەتی تەندروستی راشیگەیاند: “ئەو پەرستارانەی پێشووتر بە شێوەی خۆبەخش کاریان کردووە لە ناوەندە تەندروستییەکاندا دەتوانن فۆڕمەکە پڕ بکەنەوە بە مەرجێک ئەو دوو بەشە بێت کە وەزارەتی تەندروستی پێویستی پێیەتی”.