ژمارەیەک لایەنگری ترەمپ کوژران

ژمارەیەک لایەنگری سەرۆکی ئێستای ئەمریکا بەهۆی توندوتیژییەکانەوە، کوژران. شەوی چوارشەممە 6-1-2021، دوای داوای دۆناڵد ترەمپی سەرۆکی ئێستای ئەمریکا لە هاووڵاتییان بۆ خۆپیشاندان، لایەنگرانی ترەمپ چوونە سەر باڵەخانەی کۆنگرێسی وڵاتەکەیان لە واشنتن و دواتر چوونە ناو کۆنگرێسەوە. بەهۆی رووبەڕووبوونەوەی پۆلیس و لایەنگرانی دۆناڵد ترەمپ، چوار هاووڵاتی کوژراون، بەڵام تا ئێستا دیار نییە بە گوللەی کێ کوژراون. هێزە ئەمنییەکان 52 لایەنگری سەرۆکی ئێستای ئەمریکایان دەستگیر کردووە. دۆناڵد ترەمپ سەرۆکی ئێستای ئەمریکا، کە ماوەی سەرۆکایەتییەکەی لە 20-1-2021 کۆتایی دێت، تا ئێستا دان بە شکستی خۆی لە هەڵبژاردنی مانگی 11ـی 2020دا نانێت، کە تێیدا جۆ بایدنی کاندیدی پارتی دیموکراتەکان، سەرکەوت بەسەر ترەمپی کاندیدی کۆماریخوازەکان.