تەندروستیی راپەڕین: تەنیا هەشت تووشبووی کۆرۆنا لە نەخۆشخانەکانی دەڤەرەکە ماون

بەڕێوەبەرایەتی گشتیی تەندروستی ڕاپەڕین رایدەگەیەنێ کە سەرجەم تووشبووانی ڤایرۆسی کۆرۆنا لە نەخۆشخانەکانی سنووری راپەڕین لە یەک نەخۆشخانەدا کۆکراونەتەوە و ئاشکراشی دەکات کە تەنیا هەشت تووشبووی کۆرۆنا لە نەخۆشخانەکە ماون. تەها محەمەد، گوتەبێژی تەندروستیی ڕاپەڕین، بە (باسنیوز)ی ڕاگەیاند: “ئەمڕۆ سەرجەم تووشبوانی کۆڕۆنا لە سەنتەرەکانی تایبەت بە کۆڕۆنا لە سنووری ڕاپەڕین گواسترانەوە بۆ نەخۆشخانەی ژیان بۆ چاودێری ورد و نەخۆشییە گواستراوەکان لە ناحیەی چوارقوڕنه، کە پێشتر ئەو نەخۆشخانەیە لە لایەن خێرخوازانی سنوورەکە دروستکراوە و نەخۆشخانەیەکی 100 قەڕەوێڵەییە”. ئاماژەی بە ئەوەش کرد: “تاوەکو ئێستا 2838 کەس لە سنووری ڕاپەڕین تووشی پەتای کۆڕۆنا بوونە و هەشت تووشبوو لە نەخۆشخانەکان ماون و دۆخی تەندروستییان جێگیرە”.