باژێرڤانیێن سنوورێ پارێزگه‌ها دهۆكێ به‌رهه‌ڤیێن له‌هى و به‌فر و بارانێ دكه‌ن كو ل گۆره‌ى پێشبینیێن كه‌شناسیێ سوبه رۆژا چوارشه‌مبى دێ پێله‌كا به‌فرێ و بارانێن ب هێز سنوورێ گشت پارێزگه‌هێ ڤه‌گریت. ئیسماعیل مسته‌فا، به‌رپرسێ راگه‌هاندنا سه‌رۆكاتیا باژێرڤانیا دهۆكێ بۆ (باسنیوز) دیار كر، ماوێ دوو رۆژانه باژێرڤانیا دهۆكێ ل سه‌نته‌رێ دهۆكێ مژوولى هه‌وه‌كا به‌رفره‌هـ یا پاقژكرنا ئاڤرێژ و مه‌نهۆلانه، بۆ هندێ ل ده‌مێ هاتنا بارانێن بوش چو له‌هى په‌یدا نه‌بیت و ئاڤ ل سه‌ر جاده‌یان نه‌مینیت و ل گه‌ل هندێ ژى هه‌وه‌كا پاقژكرنێ ل سه‌ر رووبارێ هشكه‌رۆ هاتیه كرن، دا كو له‌هى و ئاڤرابوون ل سه‌ر وى رووبارى په‌یدا نه‌بیت و زیان ب خێزانێن ده‌وروبه‌رى رووبارێ هشكه‌رۆ نه‌كه‌ڤیت. دیار سادق، به‌رپرسێ پشكا ژینگه‌هێ ل رێڤه‌به‌ریا گشتیا باژێرڤانیان بۆ (باسنیوز) دیار كر، ئه‌ڤه ماوێ دوو رۆژانه ل سنوورێ هنده‌ك باژێرڤانیان وه‌كو كانى ماسێ و ل به‌رێ گاره‌ى به‌فر دباریت و تیمێن باژێرڤانیان به‌رده‌وام د خزمه‌تێ دانه بۆ پاقژكرن و ڤه‌كرنا رێكان ژ به‌فرێ و گۆت: هه‌ر ده‌مه‌كێ و ل هه‌ر جهه‌كێ به‌فر بباریت و ببیته ئه‌گه‌رێ داخستنا رێكێ، تیمێن باژێرڤانیا د ئاماده‌نه بۆ خزمه‌تكرنا خه‌لكێ ده‌ڤه‌رێ.
دهۆك.. به‌رهه‌ڤیێن له‌هى و به‌فر و بارانێ دهێنه كرن
