ژوورا ئۆپه‌راسیونا به‌رهنگاربوونا په‌تایا كۆرونایێ ئێڤاریا ئه‌ڤرۆ یا رۆژا ئێك شه‌مبى به‌یانامه‌یه‌ك به‌لاڤكریه و دانه‌یه‌ك بۆ (باسنیوز) هنارتیه و دیاركریه كۆ ده‌رگه‌هێن هۆلێن شه‌هیانا هاتنه ڤه‌كرن. ماجد سه‌ید سالح، جێگرێ پارێزگارێ دهۆكێ و د هه‌مان ده‌م دا ئه‌ندامێ ژوورا ئۆپه‌راسیونا به‌رهنگاربونا كۆرونایێ ل پارێزگه‌ها دهۆكێ بۆ (باسنیوز) دیاركر: “ب جێبەجێکرنا ڕێنمایێن تەندروستی و دوورکرنا مێزا و کونترۆلکرنا هژمارا پشکدارا، هۆلێن یٔاهەنگگێرانا ب بریارا ژوورا ئۆپه‌راسیونا به‌رهنگاربوونا كۆرونایێ ل پارێزگه‌ها دهۆكێ دێ هێنه ڤه‌كرن كۆ ده‌مه‌ك بوو ژ بۆ پاراستنا گیانێ خه‌لكى هاتبوونه گرتن”. جێگرێ پارێزگارێ دهۆكێ دۆپات ژى كر: “داخوازێ ژ لیژنێن پەیوەندیدار، خۆدانێن هولا و خۆدانێن یٔاهەنگا دکەین کۆ ڕێکارێن ساخله‌میێ بەرچاڤ وەربگرن و هەر هۆلەکا کۆ ڤان ڕێکارا جێبەجێ نەکەت لدویڤ بریارێن پێشتر دێ هێتە سزادان و ژ ئه‌ڤرۆ پێڤه ب وان بریار و رێكارێن مه ئاماژه پێداین دێ ده‌رگه‌هێن هۆلێن شه‌هیانان هێنه ڤه‌كرن”.
ل دهۆكێ ده‌رگه‌هێن هۆلێن شه‌هیانا هاتنه ڤه‌كرن
