لە گەرمیان پێنج پاسەوانی كۆمپانیایەكی نیشتەجێبوون بە تۆمەتی دزی دەستگیر کران

شەوی ڕابردوو لە شارەدێی رزگاریی سەر بە شارۆچكەی كەلاری ناوەندی ئیدارەی گەرمیان، بڕی زیاتر لە 18 دەفتەر دۆلار، لەناو كۆمپانیایەكی وەبەرهێنانی خانوبەرە دزراوە و پۆلیسی گەرمیانیش لەسەر رووداوەكە پێنج گومانلێكراوی دەستگیر كردووە كە پاسەوانی کۆمپانیاکە بوون. عەلی جەمال قەدوری، گوتەبێژی پۆلیسی گەرمیان، بە (باسنیوز)ی ڕاگەیاند: “شەوی ڕابردوو لە سنووری ناحیەی رزگاری سەور بە گەرمیان بڕی 18دەفتەر دۆلار و 50 ملیۆن دیناری عێراقی لە كۆمپانیایەكی وەبەرهێنانی خانوبەرە و لەناو پرۆژەی نۆژین سیتی یە لە قاسەی تایبەتی كۆمپانیاكە دزراوە”. ئاماژەی بەوەش كرد: “رووداوەكە لەناو كۆمپانیاكە رووی داوە و سەرەڕای ئەوەی پاسەوانی تایبەتی خۆیان هەیە، بۆیە هێزەكانی پۆلیس رێكاری لێكۆڵینەوەیان دەست پێكردوە و پەڕاوی لێكۆڵینەوەش بۆ رووداوەكە كراوەتەوە.” گوتەبێژی پۆلیسی گەرمیان راشی گەیاند: “بە فەرمانی دادگای لێكۆڵینەوەی رزگاری پێنج گومانلێكراو دەستگیر كراون كە كارمەندی كۆمپانیاكە بوون و ئەمڕۆ چوارشەممە 4/8/2021 لێکۆڵینەوەی زیاتر لەگەڵ دەستگیرکراوەکاندا دەكرێت”.