دەزگای خێرخوازیی بارزانی بە بڕی دوو ملیۆن دۆلار کۆمەڵگەی دایک لە شاری سۆران دروست دەکات

دەزگای خێرخوازیی بارزانی دەستیکردووە بە ئەنجامدانی پڕۆژەی دروستکردنی کۆمەڵگای دایک لە شاری سۆران، کە تایبەت دەبێت بۆ بەساڵاچووان و بێباوکان و نابینایان و نابیستان و نەخۆشانی ئۆتیزم. ئومێد حەسکۆ محەمەد، بەڕێوەبەری پرۆژەی کۆمەڵگای دایک لە شاری سۆران، بە (باسنیوز)ی راگەیاند: “پڕۆژەی دایک یەکێکە لەو پڕۆژە گرنگانەی کە لەلایەن دەزگای خێرخوازیی بارزانییەوە گوژمەکەی بۆ تەرخانکراوە، پڕۆژەکە تایبەتە بە لە خۆگرتنی بەساڵاچووان و بێباوکان و نابینا و نابیستان و نەخۆشانی ئۆتیزم و پەروەردەکردنیان، کە پڕۆژەکە لەسەر رووبەری ١١٫٣٥٢ مەتر دووجا دروست دەکرێت و لە شەش بینا پێکهاتووە، بە گوژمەی زیاتر لە دوو ملیۆن دۆلار”. گوتیشی: “هەرچەندە دەبێت ئەم پڕۆژەیە لە ماوەی دوو ساڵ تەواو بکرێت، بەڵام بەگوێرەی ئەو پلان و بەرنامەیەی وەک لایەنی جێبەجێکار دیاریمان کردووە، هەوڵدەدەین لەماوەی ساڵێک و نیو، پڕۆژەکە جێبەجێ بکەین، واتە کەمتر لەو ماوەیەی بۆمان دیاریکراوە”. راشیگەیاند: “ئەم شوێنە بەشێوەی تایبەتمەندی خاوەن پێداویستی دروست دەکرێت و دیزاینی پڕۆژەکە لەلایەن فاکەڵتی ئەندازیاری زانکۆی سۆران کراوە و چاودێری دەکرێت”.