بۆ یەکەمجار لە مێژووی عێراقدا، 300 کەسایەتیی عێراقی بە ئاشکرا داوای ئاساییکردنەوەی پەیوەندییەکانی وڵاتەکەیان لەگەڵ ئیسرائیل دەکەن. لە بەیاننامەکەدا کە میدیا عێراقییەکان ناوەڕۆکەکەیان بڵاو کردووەتەوە، هاتووە: ”ئێمە وەک گردبوونەوەی زیاتر لە 300 کەسایەتیی سوننە و شیعە داوا دەکەین عێراق هاوشێوەی وڵاتانی دیکەی عەرەبی، پەیوەندییەکانی لەگەڵ گەل و حکوومەتی ئیسرائیل ئاسایی بکاتەوە“. ئەو کەسایەتییانە خەڵکی پارێزگاکانی بەغدا، بابل، ئەنبار، سەڵاحەدین، دیالە و نەینەوان و لە ئەندامانی سەحوەی عێراق (سوننە) و شێخی عەشیرەتەکان و گەنجانی چالاکوانی خۆپیشاندانەکانی عێراق لە ساڵی 2019 پێک هاتوون و وەک خۆیان باسی دەکەن، بەشێکیان رۆڵمان لە شەڕی دژی رێکخراوە تیرۆریستییەکانی داعش و قاعیدە هەبووە. ئەو کەسایەتییانە ئاماژەیان بەوەش کردووە، ئەوان دژایەتیی گرووپە توندڕەوەکانی جیهادییە سوننەکان و میلیشیا شیعەکانی سەر بە ئێران دەکەن و ”نیشتیمانی بوون“ی خۆیان سەلماندووە. کەسایەتییەکان جگە لە داوای ئاساییکردنەوەی پەیوەندییەکانی وڵاتەکەیان لەگەڵ ئیسرائیل، داوای چەسپاندنی سیستەمی فیدڕالییان لە عێراق کردووە، بەو شێوەیەی دەستوور دایناوە. لە ساڵی 2020 و بە سەرپەرشتیی ئەمریکا، وڵاتانی ئیمارات، بەحرێن، سوودان و مەغریبی عەرەبی پەیوەندییەکانیان لەگەڵ ئیسرائیل ئاسایی کردەوە. پێشتریش هەردوو وڵاتی میسر و ئوردن پەیوندییەکانیان لەگەڵ ئیسرائیل ئاسایی کردبووەوە.
بۆ یەکەمجار.. 300 کەسایەتیی عێراقی داوای ئاساییکردنەوەی پەیوەندییەکان لەگەڵ ئیسرائیل دەکەن
