ژمارەیەک فڕۆکە بنکەکانی حەشدی شەعبی لە سووریا بۆردومان دەکەن

ژمارەیەک فڕۆکەی نەناسراو بنکەکانی میلیشیاکانی حەشدی شەعبی لە پارێزگای دێرەزوور لە رۆژهەڵاتی سووریا بۆردومان دەکەن. روانگەی سووری بۆ مافەکانی مرۆڤ لە بەیاننامەیەکدا، رایگەیاندووە: بەرەبەیانی ئەمڕۆ سێشەممە 28-9-2021، دەنگی چەند تەقینەوەیەک لە سەر سنووری نێوان عێراق و سووری لە نزیک شاری ئەلبوکەمال لە پرێزگاری دێرەزوور لە سووریا، بیستراوە. روانگەکە هەروەها رایگەیاندووە: تەقینەوەکان بەهۆی بۆردومانی فڕۆکەیەکی نەناسراو روویان داوە. هەروەها کەناڵی (سکای نیوز) لە زاری ”سەرچاوە سەربازی و مەدەنییەکان“ی بڵاوی کردووەتەوە، ”ژمارەیەک فڕۆکەی نەناسراو“ بنکە و بارەگاکانی میلیشیاکانی سەر بە ئێرانیان لە باشووری شارۆچکەی مەیادین لەسەر رووباری فورات بۆردومان کردووە. هەروەک ئەو کەناڵە بڵاوی کردووەتەوە، ئەو میلیشیایانەی کراونەتە ئامانج بەشێکیان بریتین لە میلیشیاکانی حەشدی شەعبی و تا ئێستا زیانە مرۆییەکانی بۆردومانەکان نەزانراوە.