سوپا و هێزە ئەمنییەکان لە دژی هەڕەشەی میلیشیاکان لە شەقامەکانی بەغدا بڵاو دەکرێنەوە

هێزێکی زۆری سوپاو هێزە ئەمنییە عێراقییەکان لە دژی هەڕەشەی میلیشیاکانی حەشدی شەعبی، لە شەقامەکانی بەغدا بڵاو دەکرێنەوە. دوای راگەیاندنی دوایین ئەنجامی هەڵبژاردنی پێشوەختەی پەرلەمانی عێراق، حەشدی شەعبی ئەنجامەکانی رەت کردووەتەوە و بەردەوام داوای خۆپیشاندان و دەربڕینی ناڕەزایی لە چەکدارەکانی دەکات. بەپێی زانیارییەکان، حکوومەتی عێراق بۆ رێگرتن لە هەر هەڕەشەیەکی حەشدی شەعبی، هێزێکی زۆری سوپا و هێزە ئەمنییەکانی بە شەقامەکانی بەغدا بەتایبەت بە دەوروبەری ناوچەی سەوز، بڵاو کردووەتەوە. رۆژی 10-10-2021 هەڵبژاردنی پێشوەختەی پەرلەمانی عێراق بەڕێوە چوو و بەپێی دوایین ئەنجامی بەراییش، ژمارەی کورسییەکانی هاوپەیمانیی فەتح (هاوپەیمانیی حەشدی شەعبی) بۆ 16 کورسی دابەزی.