سەرۆكی حزبێكی توركمانی: دەمانەوێت لایەنەکانی هەرێمی کوردستان لە بەغدا یەکڕیز و یەکدەنگ بین

ئەمڕۆ شاندێكی باڵای پارتی دیموكراتی كوردستان سەردانی لایەنە سیاسییە توركمانییە كوردستانییەكانی كرد و سەرۆكی پارتێکی توركمانییش ناوەڕۆكی كۆبوونەوەكەیان دەخاتە ڕوو. لەم بارەیەوە، عیرفان كەركووكلی، سەرۆكی پارتی گەلی توركمانی، بە (باسنیوز)ی ڕاگەیاند: ”ئەمڕۆ شەممە 23/10/2021، چەند لایەنێكی توركمانی پێشوازیمان لە شاندێكی پارتی دیموكراتی كوردستان بە سەرۆكایەتیی فازڵ میرانی، سكرتێری مەكتەبی سیاسیی پارتی كرد و بارودۆخی عێراق بەگشتی و بەتایبەتی دوای هەڵبژاردنی پەرلەمانمان تاوتوێ کرد و ئێمەش وەك لایەنە سیاسییە توركمانییەكان جەختمان لەوە كردەوە کە یەكڕیزی بپارێزین و لە بەغدا یەكدەنگ بین بۆ ئەوەی مافەكانمان بەدەست بهێنین”. ماوەی چەند ڕۆژێكە پارتی دیموكراتی كوردستان وەك دەستپێشخەری بۆ یەكڕیزی سەردانی لایەنە سیاسییەكانی هەرێمی کوردستانی دەست پێ كردووە و ئەمڕۆش سەردانی لایەنە سیاسییە توركمانییەكانی كرد.