سوپای سوودان کودەتای بەسەر حکوومەتی کاتیی وڵاتدا کرد

بەشێک لە سوپای سوودان کودەتایەکی سەربازییان لە وڵاتەکەیان کرد و سەرۆک وەزیرانیان خستە ژێر مانەوەی ناچاری. بەرەبەیانی ئەمڕۆ دووشەممە 25-10-2021، هێزێکی سەربازیی سوودانی کە لە چەندین بەشی سوپا پێکهاتووە، دەستیان بەسەر خەرتوومی پایتەختدا گرت و بە شەقامەکاندا بڵاو بوونەوە. هێزە سەربازییەکە عەبدوڵڵا حەمەدۆک، سەرۆک وەزیرانی خستووەتە ژێر مانەوەی ناچاری و رێگای پێنادات کاروبارە ئاساییەکانی بەڕێوە ببات. بەپێی زانیارییە میدیاییەکان، هێزە سەربازییەکە ژمارەیەک وەزیری حکوومەتی کاتیی سوودان و ژمارەیەک ئەندامی مەدەنیی ئەنجوومەنی سەروەریی سوودان و ژمارەیەک کەسایەتیی سیاسیی وڵاتەکەیان دەستگیر کردووە. دوای لەکار لادانی عومەر حەسەن بەشیر لە سەرۆکایەتیی وڵات، سوپای سوودان ئەنجوومەنی سەروەریی سوودان و حکوومەتی کاتی پێکهێنا، بەمەبەستی بەڕێوەبردنی کاتیی وڵاتەکەی. رۆژی 11-4-2019، سوپای سوودان لەسەر کار لادانی عومەر حەسەن بەشیری سەرۆکی وڵاتەکەی دوای 30 ساڵ سەرۆکایەتی (1989 – 2019) راگەیاند.