کازمی فەرمانی لێکۆڵینەوە لە شەڕی خۆپیشاندەران و هێزە ئەمنییەکانی بەغدا دەردەکات

سەرۆک وەزیران و فەرماندەی گشتیی عێراق فەرمانی لێکۆڵینەوە لە شەڕی خۆپیشاندەران و هێزە ئەمنییەکانی بەغدا دەردەکات. دوای نیوەڕۆی رۆژی هەینی 5-11-2021، خۆپیشاندەرانی بەردەم ناوچەی سەوزی بەغدا و هێزە ئەمنییەکان رووبەڕووی یەک بوونەوە. میدیا عێراقییەکان ئاماژە بە کوژرانی خۆپیشاندەرێک و برینداربوونی 346 کەس دەکەن و وەزارەتی تەندروستیی عێراقیش رایگەیاندووە: بەهۆی ئاڵۆزییەکانەوە 125 خۆپیشاندەر و کارمەندی ئەمنی بریندار بوون، بەڵام هیچ کەسێک نەکوژراوە. فەرماندەیی ئۆپەراسیۆنە هاوبەشەکان رایگەیاندووە: ئەمڕۆ شەممە 6-11-2021 لێژنەیەک بە فەرمانی مستەفا کازمی، سەرۆک وەزیرانی عێراق بۆ لێکۆڵینەوە لە شەڕ و ئاڵۆزییەکانی نێوان خۆپیشاندەران و هێزە ئەمنییەکان، پێک هێنراوە، کە ئاسایشی دەستەی میلیشیاکانی حەشدی شەعبیش ئەندامە تێیدا. خۆپیشاندەران بەرپرسیارێتیی شەڕ و بوونە قوربانیی خۆپیشاندەران دەخەنە ئەستۆی مستەفا کازمی، فەریقی یەکەم روکن عەبدولوەهاب ساعدی، سەرۆکی دەزگای دژەتیرۆری عێراق و لیوا روکن حامد زوهەیری، فەرماندەی هێزی تایبەتی پاراستنی باڵوێزخانەکان لە بەغدا. دوای راگەیاندنی دوایین ئەنجامی بەرایی هەڵبژاردنی پێشوەختەی پەرلەمانی عێراق کە لە 10-10-2021 بەڕێوە چوو، بەشێک لەو گرووپانەی لە هەڵبژاردنەکەدا شکستیان خوارد، لە نزیک ناوچەی سەوزی بەغدا دەستیان بە خۆپیشاندان کرد و داوای هەڵوەشاندنەوەی ئەنجامەکانی هەڵبژاردنەکە دەکەن. زۆرینەی خۆپیشاندەران لایەنگری میلیشیاکانی حەشدی شەعبین، کە ژمارەی کورسییەکانی هاوپەیمانییەکەیان (هاوپەیمانیی فەتح) لە پەرلەمانی عێراق لە 47 کورسییەوە دابەزی بۆ 16 کورسی.