تەقینەوەیەک لە نزیک دەزگایەکی ناوکیی ئێران رووی دا

تەقینەوەیەک لە نزیک دەزگایەکی ناوکی لە پارێزگای ئەسفەهان لە ناوەڕاستی کۆماری ئیسلامیی ئێران رووی دا. بەپێی هەواڵی میدیا ئێرانییەکان، شەوی شەممە 4-12-2021 تەقینەوەیەک لە ئاسمانی ناوچەی بادروود لە نزیک شارۆچکەی نەتەنز لە ئەسفەهان رووی داوە. هەروەک ئەو میدیایانە باسی دەکەن، تەقینەوەکە دوای بە ئامانجگرتنی ”تەنێکی نەناسراوی نامۆ“ لە ئاسمانی ناوچەکە لەلایەن هێزە ئاسمانییەکانی ئێرانەوە رووی داوە. تەقینەوەکە کە دەنگێکی گەورە و رووناکییەکی فراوانی لێ پەیدا بووە، نزیکەی 20 کیلۆمەتر لە دووریی دەزگای ناوکیی نەتەنز رووی داوە و خەڵکی ناوچەکە بە تەواوی دەنگی تەقینەوەکەیان بیستووە.