هەڵاوسان لە بازاڕی تورکیادا بە ڕادەیەکە خەڵک بە دانە تەماتە و خەیار دەکڕن

دروشمی یەك زمان و یەك میللەت و یەك دەوڵەت و یەك ئاڵا، بەردەوام لەسەر زاری ڕەجەب تەییب ئەردۆغان، سەركۆماری توركیایە، بەڵام خراپیی ڕەوشی هاووڵاتییانی توركیا بەدەست هەژاری و هەڵاوسانی ئابووری و گرانیی نرخەوە ئەو دروشمە، یەك تەماتە و یەك خەیاری بۆ زیاد كراوە. لە توركیا، گرانیی بە جۆرێك بەربڵاوە، بەشێكی زۆری هاووڵاتییان ناتوانن بە كیلۆ تەماتە، یان خەیار، یان هەر میوەیەكی تر بكڕن، ناچارن دانە دانە بیكڕن و بیبەنە ماڵەوە. نرخی یەك تەماتە گەیشتووەتە 3.47 لیرە، یەك باینجان 4.8 لیرە، یەك بیبەر 1.72 لیرە، یەك خەیار 4.40  لیرەی توركییە. پێشتریش یەك كیلۆ لەو جۆرە سەوزەواتانەی باسم كردن بەو نرخە دەفرۆشرا، بۆیە هاووڵاتی لە توركیا و باكووری كوردستان، ئیدی بە دانە میوە و سەوزە دەكڕن، نەك بە كیلۆ. بە گوێرەی ئەو زانیارییانەی لە میدیاكانی توركیاوە بڵاو كراوەتەوە، لە ماوەی یەك ساڵدا، نرخی خۆراك بە ڕێژەی 70.33٪ بەرز بووەتەوە. هەروەها نرخی دەرمانیش 34.95٪ بەرز بووەتەوە. ئەگەر باس لە گرانبوونی هەموو ئەو شتانە بكەین كە لە توركیادا ئێستا پەیڕەو دەكرێت، دەبێت یەك كتێبی لەسەر بنووسین، بەڵام تیشك دەخەینە سەر ئەو كەلوپەلانەی پەیوەستە بە ژیانی خەڵكەوە، بۆ نموونە، نرخی گواستنەوە، واتە میترۆ و پاس و تاكسی، بە ڕێژەی 99.12% بەرز بووەتەوە، هەروەها نرخی خوێندنیش 26.73%، نرخی گازی سروشتی و كارەبا، لە ماوەی یەك ساڵدا 228.94% بەرز بووەتەوە. وەكوو ئەوەی میدیاكانی توركیا باسی دەكەن، دەزگا فەرمییەكانی حكوومەت دەڵێن، هەڵاوسانی ئابووری لە توركیا 61.14%ە، بەڵام دەزگاكانی سەر بە ئۆپۆزسیۆن دەڵێن، هەڵاوسان لە توركیا گەیشتووەتە 124.63%، لە هەردوو ئەگەرەكە، ڕێژەكە كارەساتە و دەری دەخات هاووڵاتی لە ژیانێكی چەند سەختدا دەژین. ڕۆژنامەنووس، یاڵچن دۆغان، پێی وایە توركیا لە ڕووی ئابوورییەوە گەڕاوەتەوە بۆ 28 ساڵ بەر لە ئێستا، واتە 1994 تا 2002، قەیرانەكەی پێ لەو سەردەمە ترسناكتر و سەختترە. یاڵچن دەڵێت: ”توركیا لە یەك زمان و یەك میللەت و یەك دەوڵەت و یەك ئاڵاوە بۆ یەك تەماتە و یەك خەیار هەنگاوی ناوە”.