ئه‌نجوومه‌نی نیشتمانیی كورد له سووریا (ئه‌نه‌كه‌سه) رایگه‌یاند، كه له‌لایه‌ن په‌كه‌كه‌وه باره‌گاكه‌یان له شاری دێرك و دێرباسێ له رۆژئاوای كوردستان سووتێندراوه. ئه‌مڕۆ سێشه‌ممه 19/4/2022، سه‌رچاوه‌یه‌ك له ئه‌نه‌كه‌سه رایگه‌یاند، كه به‌ره‌به‌یانیی ئه‌مڕۆ، كه‌سانی سه‌ر به په‌كه‌كه، هێرشیان كردووه‌ته سه‌ر باره‌گای ئه‌نه‌كه‌سه له شاری دێرك و باره‌گه‌كه‌یان سووتاندووه. هه‌روه‌ها ئه‌و سه‌رچاوه‌یه رایگه‌یاند، كه ئه‌و كه‌سانه‌ی سه‌ر به په‌كه‌كه، به مۆلۆتۆف هێرشیان كردووه‌ته سه‌ر باره‌گاكه‌یان له دێرك و سووتاندوویانه، هاوكات له شاری دێرباسیه‌ش به هه‌مان شێوه و به مۆلۆتۆف هێرشیان كردووه‌ته سه‌ر باره‌گای ئه‌نه‌كه‌سه و سووتاندوویانه. ئه‌و هێرش و كاره تێكده‌رانه‌ی په‌كه‌كه، بۆ راگرتن و خاوكردنه‌وه‌ی گفتوگۆ و دانوستانی نێوان كورد و كورده له رۆژئاوا به پشتیوانیی ئه‌مریكا.
ئه‌نجوومه‌نی نیشتمانیی كورد له سووریا: په‌كه‌كه دوو باره‌گای سووتاندین
