لینکی خۆتۆمارکردن بۆ دامەزراندنی گەنجان لە ڕیزی پاسەوانی سنووری عێراق کارا کرا و پەرلەمانتارێکیش دەڵێ: ”نزیكەی سێ هەزار و 600 گەنجی هەرێمی كوردستان لە ڕیزەكانیان دادەمەزرێن.“ لای خۆیەوە، سیپان شێروانی، ئەندامی لیژنەی ئابووری لە پەرلەمانی عێراق، بە (باسنیوز)ی راگەیاند: “لینکی خۆتۆمارکردن بۆ دامەزراندنی گەنجان لە ڕیزی پاسەوانی سنووری عێراق ئێستا کارایە، گەنجانی خۆشەویستی کوردستان و ناوچە سنوورییەكانی سنووری ئیدارەی سەربەخۆی سۆران (مێرگەسۆر، سۆران، سیدەكان، چۆمان، ڕواندز) بە تایبەتی و هەرێمی كوردستان بەگشتی، دەتوانن خۆیان تۆمار بکەن.” ئاماژەی بەوەش دا: “دوای چەندان جار داواكردن لە دەسەڵاتدارانی عێراق بۆ دامەزراندنی گەنجانی ناوچە سنوورییەكانمان لە ڕیزی پاسەوانی سنووری عێراق، كە ئەوان زیاتر لە هەركەسێك بە باشترین شێوە ناوچەكانیان دەپارێزن، چونكە هەم لە ناوچەكانیان شارەزان، هەمیش ئەو ناوچانە جارێك دێهاتەكانیانە و جارێكیش وڵاتیانە، دواجار وەزارەتی ناوخۆی عێراق بڕیاری دا، نزیكەی سێ هەزار و 600 گەنجی هەرێمی كوردستان لە ڕیزەكانیان دابمەزرێنێ.” ئێستا سێ لیوای پاسەوانی سنوور هەیە، کە ئێستا سنوورەکانی هەرێمی کوردستان دەپارێزن، لیوای 3ی سلێمانی، لە سنوری خانەقینەوە بە درێژایی نزیکەی 528 کیلۆمەتر تا سنووری قەندیل دەپارێزێت. لیوای 2 ی هەولێر و لیوای 3 ی دهۆکیش، پارێزگاری لە ناوچە سنورییەکانی قەندیل تا سنوروی سووریا دەکەن. ئەو پەرلەمانتارە داوا دەکات، مەرجە پێویستەكانی تێدایە، فۆرمی دامەزراندن لە لینكی خوارەوە پڕ بكەنەوە، تاکوو بتوانن لە ڕیزەكانی پاسەوانی سنوور دامەزرێن: “بۆ خزمەتكردن و پاراستنی سنووری هەرێمی کوردستان لە دەستدرێژی و بەزاندنی سنوور لەلایەن هێزە چەكدارەكان و حكوومەتی وڵاتانی دراوسێیەوە.” کاروان خۆشناو، گوتەبێژی ناوچەی یەکی پاسەوانی سنوور زانیاری لەبارەی پڕکردنەوەی فۆڕمەکە بڵاوکردەوە و داواش دەکات ئەو گەنجانەی دەیانەوێت دابمەزرێن پێویستە بە زووترین بەشێوەی ئۆنلاین خۆیان ناونووس بکەن، چونکە لینکەکە بۆ ماوەی سێ رۆژ کارا دەبێت. سەبارەت بە پڕکردنەوەی فۆڕمەکە کاروان خۆشناو روونی کردەوە، دەبێت تەواوی زانیارییەکان بە زمانی عەرەبی لە فۆڕمەکەدا تۆمار بکرێن. ئاماژەی بەوەش کرد، لە کاتی پڕکردنەوەی فۆڕم کۆدێکت بۆ دێتەوە دەبێ ئەو کۆدە لای خۆت بپارێزیت. لینکی ناوتۆمارکردنی فەرماندەیی پاسەوانانی سنووری ناوچەی یەک: https://moi-jobs.iq/order.php?id=86
(باسنیوز) وردەکاریی خۆتۆمارکردن بۆ پاسەوانی سنوور ده‌خاته ڕوو
