دەزگایەكی ڕاپرسی: هاوپەیمانیی میللەت لە پێش هاوپەیمانیی كۆمارییەوەیە

دەزگایەكی ڕاپرسی لە توركیا ئاشكرای دەكات، ئەگەر بەیانی هەڵبژاردنی پەرلەمانی لە توركیا بکرێت، دەنگی هاوپەیمانیی (میللەت) لەپێش هاوپەیمانیی (كۆماری)یەوەیە. دەزگای ڕاپرسیی (بوپار)ی توركی، لە ڕاپرسییەكدا بڵاوی كردووەتەوە و لە هاووڵاتیانی پرسیوە ئەگەر بەیانی هەڵبژاردن لە توركیا بکرێت، دەنگ بەكێ دەدەیت؟ 60.5%ی بەشداربووی ڕاپرسییەكە گوتوویانە دەنگ بە هاوپەیمانیی (میللەت) دەەدین، كە پارتە ئۆپۆزسیۆنەكان جیا لە هەدەپە پێكیان هێناوە، هەروەها 30.5% بەشداربوانی ئەو ڕاپرسییە گوتوویانە دەنگ بە هاوپەیمانیی كۆماری دەدەین. لەبارەی هەڵبژاردنی سەرۆكایەتیی كۆماریشەوە بە هەمان شێوەیە 55.5% گوتوویانە دەنگ بە بەربژێری هاوپەیمانیی (میللەت) دەدەین و 38.5% گوتوویانە هاوپەیمانی كۆماری. ئەو دەزگای ڕاپرسییە لە شارەكانی ئیستانبوڵ، ئەنكەرا، بورسە، مێرسین، ئیزمیر، ئامەد و سامسۆن ڕاپرسییەكەی بەڕێوە بردووە.