زیرەکیی دەستکرد جیهانی خستووەتە مەترسییەوە

ئەمڕۆ بۆ یەكەم جار، ئیلۆن ماسك ملیاردێری ئەمریكی و زانا و لێكۆڵەرەكانی بوارەكە، داوای ڕاگرتنی پەرەپێدانی (زیرەكیی دەستكرد)یان كرد بۆ ماوەی شەش مانگ، ئەمەش دوای ئەوەی دەركەوتووە كە زیرەکیی دەستکرد، گەیشتووەتە ئاستێك كە مەترسیی بۆ جیهان دروست كردووە. ئیلۆن ماسك و دەیان زانا و لێكۆڵەری بواری زیرەكیی دەستكرد نامەیەكی كراوەیان بڵاو كردووەتەوە و داوایان كردووە لە ئێستاوە تا شەش مانگی تر، پەرەپێدانی بەرنامەی رۆبۆت چاتی (Chat GPT4) رابگیرێت، كە لەلایەن كۆمپانیای Open AI خاوەندارییەتی دەكرێت و بەم دواییە پەرەپێدانی بەرنامەكە گەیشتووەتە ئاستێك كە مەترسیی لەسەر كۆمەڵگەی مرۆیی دروست دەكات. جێی باسە دوا ڤێرژنی بەرنامەی Chat GPT گۆڕانێكی گەورەی بەسەردا هاتووە لە ڕووی خێرایی وەڵامدانەوەی پرسیارەكان و دۆزینەوەی چارەسەر و دروستكردنی وەڵامی دروست و نمونەیی.