دەستبەسەرداگرتنی پاسپۆرت و مۆڵەتی نشینگە و مۆری ساختەکراو لە دەروازەی نێودەوڵەتیی حاجی ئۆمەران

لە ڕێکەوتی 26/5/2023  لەلایەن بنکەی نشینگە و پاسپۆرتی دەروازەی نێودەوڵەتیی حاجی ئۆمەرانەوە دەست بەسەر دوو پاسپۆرت و مۆڵەتێکی ساختەکراوی نشینگەدا گیراوە. بەپێی زانیارییەکانی (باسنیوز) ھەموو مۆرەکانی ناوەوە و دەرەوەی ھەرێمی کوردستان لەسەر پاسپۆرتی ھەڵگرانی ئەو پاسپۆرت و مۆڵەتانەی نشینگە ساختە کراون، خۆشبەختانە بە لێھاتوویی و شارەزایی و زیرەکیی ئەفسەر و کارمەندانی نشینگە و پاسپۆرتی حاجی ئۆمەران، پاش وردبینیکردن و لیکۆلینەوە دەر کەوت کە پاسپۆرت و مۆڵەتی نشینگە و مۆرەکانیان ساختە کراون و دەستیان بەسەردا گیرا. شایانی باسە، ئەوە چەندین جارە پاسپۆرت و مۆڵەتی نشینگە و مۆری جیاجیای ساختە لەلایەن ئەفسەر و کارمەندانی بنکەی نشینگە و پاسپۆرتی دەروازەی نێودەوڵەتیی حاجی ئۆمەرانەوە لە خاڵی پشکنینی پاسپۆرت، پاش وردبینیکردن دەستیان بەسەردا دەگیرێت.