لە بەغدا بەهۆی نەبوونی خزمەتگوزارییەوە خۆپیشاندان دەستی پێ كرد

ئێوارەی ئەمڕۆ دووشەممە لە ناوچەكانی باكووری شاری بەغدای پایتەختی فیدراڵی، خۆپیشاندانی جەماوەری بەهۆی نەبوونی خزمەتگوزارییە سەرەتاییەكانەوە دەستی پێ كرد. خۆپیشاندەران ناڕەزاییان لە دژی شارەوانی و حكوومەتی فیدراڵی دەربڕی لە بەرانبەر دابین نەكردنی خزمەتگوزارییە سەرەتاییەكانی وەكو نەخۆشخانە و چاك نەكردنەوەی ئاوەڕۆكان و قیرتاو نەكردنی شەقامەكانی پایتەختی فیدراڵی. بەپێی میدیاكانی عێراق، ئەم ئێوارەیە ژمارەیەكی زۆری هاووڵاتییانی ناڕازی لە گەڕەكی سەبع ئەلبور ڕژانە سەر شەقام و ناڕەزاییان دەربڕی و داوایان لە محەمەد شیاع سوودانی سەرۆكی حكوومەتی فیدراڵی كرد سەردانی ناوچەكەیان بكات و بە چاوی خۆی ببینێت لە چ دۆخێكدا دەژین.