دەزگای خێرخوازیی بارزانی لە ئیدارەی سۆران هاوكاریی دارایی سەدان منداڵی بێباوك دەكات

بەرپرسی ئۆفیسی سۆرانی دەزگای خێرخوازیی بارزانی دەڵێت، دەزگای خێرخوازیی بارزانی بەپێی چەند ڕێنوێنییەك، لە سنووری ئیدارەی سۆران هاوكاری دارایی و پێداویستی پێشکەشی قوتابیانی بێباوك دەكات و تا ئێستا ناوی زیاتر لە 500 منداڵ تۆمار كراوە. نێچیرڤان عەبدلواحید گوانی، بەرپرسی ئۆفیسی سۆرانی دەزگای خێرخوازیی بارزانی، بە (باسنیوز)ی ڕاگەیاند: “دەزگای خێرخوازیی بارزانی لە بەردەوامیی پرۆژەی ئازیزانیدا كۆمەڵێك مەرج و ڕێنوێنیی نوێی بۆ‌ دیاری كراوە، بۆ تۆماركردنی منداڵانی بێباوك، بەتایبەت ئەوانەی كە قوتابین، بە مەبەستی پێدانی هاوكاری دارایی مانگانە و پێدانی پێداویستییەكانی دیكە”. گوتیشی: ڕێنوێنییەكان بۆ تۆماركردنی سوودمەندان لەم پڕۆژەیە بریتین لە “منداڵەكە تەمەنی لە خوار 10 ساڵی بێت، وەفاتنامەی باوكی بێنێت، پشتگیریی قوتابخانەی هەبێت، باروگوزەرانیان خراپ بێت”، بۆ ئەمەش تیمێكی تایبەت دیاری كراوە و لە سنووری ئیدارەی سەربەخۆی سۆران ناوەكان تۆمار دەكرێن، ئێستا ناوی زیاتر لە 500 منداڵ تۆمار كراوە و بەردەوامیشن لە تۆماركردنیان”. ئاماژەی بەوەش دا: “لە دوای تۆماركردنی ناوی ئەم منداڵانە و گونجانیان لەگەڵ ڕێنوێنییەكان، مانگانە هاوكاریی داراییان لەلایەن دەزگای خێرخوازیی بارزانی بۆ دابین دەكرێت، جگە لەوەش، لە كاتی بۆنە و ئاهەنگەكاندا هاوكاری و پێداویستیی دیكە بەم منداڵانە دەدرێت.”