شارەبان.. بەهۆی تەقینەوەی بۆمبێكی چێندراو جووتیارێک گیانی لەدەست دا

بەهۆی تەقینەوەی بۆمبێكی چێندراو، لە سنووری قەزای (شارەبان)ی سەر بە پارێزگای دیالە، جووتیارێك گیانی لەدەست دا. لەم بارەیەوە، هەیسەم سەلمان، گوتەبێژی فەرماندەیی پۆلیسی دیالە، بە (باسنیوز)ی ڕاگەیاند: ئەمڕۆ دووشەممە 10ی 7ی 2023، لە گوندێكی ناوچەی ئەبی سەیدای سەر بە قەزای شارەبان، بەهۆی تەقینەوەی بۆمبێكی چێندراو لە كێڵگەیەكی كشتوكاڵیدا جووتیارێک بەسەختی بریندار بوو. گوتەبێژەكەی فەرماندەیی پۆلیسی دیالە ئاشكرایشی كرد: دواتر جووتیارەکە بەهۆی سەختیی برینەکانییەوە گیانی لەدەست دا. جووتیارەكە ناوی حوسێن عاشوورە و لە كاتی كاری كشتوكاڵیدا بۆمبە چێندراوەكە پێیدا تەقیوەتەوە. شارەبان قەزایەكی سەر بە پارێزگای دیالەیە و بەشێك لە كوردانی فەیلیی نیشتەجێی شارەبان و دەوروبەریین.