دهۆک.. نێزیکى 50 پێشمەرگێن شۆرەشا ئەیلۆل و گۆلانێ هاتنە خەلات کرن

ل دهۆکێ وەکە رێزگرتن بەرامبەر خزمەت و ماندیبونا وان پێشمەرگێن بەرەڤانى ژ ئاخا پیرۆز یا کوردستانێ کرى، نێزیکى 50 پێشمەرگەیان هاتنە خەلاتکرن. هیڤیدار یۆنس، بەرپرسێ لقا دهۆک و زاخۆ یا دەزگایێ نیڤدەولەتى یێ پێشمەرگە بۆ کارۆبارێن مرۆڤایەتى بۆ(باسنیوز) دیارکر: “پێشمەرگە ئەو کەسەیە کۆ هەردەم خوینا وى ئامادەیە بۆ رزگارکرن و پاراستنا ئاخا پیرۆز یا کوردستانىێ، د کەڤن دا تا نۆکە، پێشمەرگێن مە بەرەڤانى ژ ئاخ و کەرامەتا مە کریە، لەورا مە ژى خواستیە ماندیبونا وان پێشمەرگەیان ژبیرنەکەین یێن بووینە ئەگەر ئەڤرۆ ئەم ب ئازادى ژیانێ دەرباز دکەین.” گۆتژى: “ل دهۆکێ نێزیکى 50پێشمەرگێن پشکدارى د هەردوو شۆرەشێن ئەیلۆل و گۆلانێ دا کرى، ژلایێ دەزگایێ نیڤدەولەتى یێ پێشمەرگە بۆ کارۆبارێن مرۆڤایەتى ڤە هاتنە خەلاتکرن، هەلبەت ئەو خەلاتە ناهێتە بەرامبەر خزمەتا وان، لێ دا کۆ رێزێ ل وێ ماندیبونێ بگرین، مە ئەو خەلاتە پێشکێشى وان کرینە، دوهى پێشمەرگەى ئەم پاراستینە، فەرە ئەم ژى بەردەوام هزر د ماندیبونا وان دا بکەین.”