شارەزایەکی کاروباری ئەڵمانیا کە هاوکات دانیشتووی ئەو وڵاتەیە، لەبارەی بڕیارەکەی پۆلیسی ئەڵمانیا بۆ قەدەغەی مامەڵەکردن لەگەڵ پەکەکە و هۆشداری بۆ خەڵک به‌وه‌ی كۆمه‌كیان نه‌كه‌ن، رای گەیاند، ئەڵمانیا وڵاتێکی تەواو سیستەماتیکی یاساییە و بە ئاسانی رێکخراو و گرووپ یان حزبێک ناخاتە نێو لیستی تیرۆرەوە، ئەگەر کاری نایاسایی و مامەڵەی نەشازی نەکردبێت، پەکەکەش به‌جۆرێك له جۆره‌كان ناوی کوردی لەو وڵاتە ناشیرین کردووە، کە بە دەیان ساڵی دیکە ناتوانین چاکی بکەینەوە. ئه‌مڕۆ شه‌ممه 12/8/2023، هۆگر عەلی، شارەزای کاروباری ئەڵمانیا و دانیشتووی ئەو وڵاتە، بە (باسنیوز)ی راگەیاند؛ چەندان رێکخراوی وەک پەکەکە، حزبوڵا، حەماس، رێکخراوی چەپی رادیکاڵ و رێکخراوی راستڕەویش کە باوەڕیان بە توندوتیژی هەیە لە ئەڵمانیا قەدەغە کراون، هەموو جۆرە هاوکاری و پەیوەندییەک لەگەڵ ئەم حزبانە و پەکەکە بەتایبەت بە نایاسایی و دژایەتیکردنی دەستوور و یاسا لە قەڵەم دەدرێت، واتە چۆن مامەڵە لەگەڵ تیرۆرست دەکرێت ئاواش مامەڵە لەگەڵ ئەندامانی ئەو گرووپە دەکرێت، نەک تەنیا لە ئەڵمانیا بەڵکوو لە هەموو ئەورووپا پەکەکە لەلیستی تیرۆردایە، ئەم بڕیارەش هەروا بە ئاسانی نەدراوە، کۆمەڵێک ستاندارد هەن بۆ ئەوەی رێکخراوێک بخرێتە نێو لیستی تیرۆرەوە. ئه‌و شاره‌زایه، گوتیشی؛ پەکەکە لە ئەڵمانیا کۆمەڵێک کردەوەی کردووە وەک کوشتن، لێدان، سووکایەتیکردن بە خەڵک، سپیکردنەوەی پاره، کاری نایاسایی، مامەڵەی نایاسایی و کاری رەش، زۆر شتی دیکەی لە ئەورووپاش کردووە، بەجۆرێک زیانی بە سومعەی کورد گەیاندووە، بەداخەوە بەشێک لە خەڵکیش لەگەڵیاندا بەشدارن، لە ساڵانی نەوەدەکانەوە تا ئێستا دەیان ئەندامی پەکەکە لە زیندانەکانی ئەڵمانیا و ئەورووپان، وەک ئەندامی رێکخراوی تیرۆرستی مامەڵەیان لەگەڵ دەکرێت. ئەوەشی خستە روو کە ئەڵمانیا وڵاتێکی تەواو سیستەماتیکی یاساییە، رێگە بەوە نادات رێکخراوێک لەنێو ولاتەکەی مونەزەمە و یاسای پارالێڵی تێدا دابنرێت و خاوەنی یاسا خۆی بێت، کەی بیەوێ ئەم رێکخراوە هەستێت پارە و باج لە خەڵک بستێنێت و زوڵمی لێ بکات، ئەگەر خەڵکەکەش رازی نەبوون بەو باجدانە لێیان بدات و سووکایەتیان پێ بکات و بیانکوژێت، لە مێژووی پەکەکە و لە ئەڵمانیا سەدان حاڵەتی کوشتن و بریندارکردن و سووکایەتیکردن بە خەڵک تۆمارکراوە. ئەو شارەزایەی کاروباری ئەڵمانیا دەڵێ؛ ئەم بڕیارەی پۆلیسی ئەڵمانیا تایبەت و نوێ نییە کە دەرکرابێت، بەڵکوو ئیجرائاتێکی یاساییە کە بەردەوام بیری خەڵک دەهێنرێتەوە، رەنگە بەشێک لە کوردەکان لەبەر هەستی نەته‌وایەتی و دۆزی کورد لێی بێدەنگ بن، بەڵام لەوە تێناگەن لە زیانی گەورە بەخۆیان لە ئەڵمانیا دەگەیەنن، چونکە هاوکاریکردنی پەکەکە و باجدان پێی دەبێتە هۆی ئەوەی غەرامە بکرێن، هەروەها بەند بکرێن، ئەگەر یەک جار بەند بکرێن ئەوا هەرگیز رەگەزنامەی ئەڵمانیایان پێ نادرێت، چونکە بەپێی یاسای ئەڵمانیا هاوکاریکردنی پەکەکە هاوکاریکردنی رێکخراوێکی تیرۆرستییە، هەموو شتەکان پێکەوە بەستراون، دوای بەندکردنی هەر کەسێک هەندێک کاریش هەیە کە رێگەی پێنادرێت بیکات و لە کۆمەڵێک حەق و ئیمتیاز بێبەش دەکرێت. هاوکات هۆگر عەلی پێیوایە زۆر جاو قسە و باس لەسەر ئەوە کراوە، گوایە ئەو بڕیار و یاسایانەی دژی پەکەکە دەردەکرێن سیاسییە و لە تورکیاوە دەرچوون، بەڵام پێچەوانەی ئەمە راستە، چونکە ئەو بڕیارانە لە ئەنجامی مامەڵە و رەفتارەکانی پەکەکە لە ئەورووپا و ئەڵمانیاوە دەرکراون و له‌خۆڕا و هه‌ڕه‌مه‌كی دەرنەچوون، پەکەکە رێکخراێکی چەپی رادیکاڵە و باوەڕی بە توندوتیژی هەیە و یەکلایکردنەوەی رێگای هێزەوە بۆ بابەتەکان دەبینێت، ئەم رێکخراوە لە ئەڵمانیا قەدەغە کراوە.
شارەزایەکی کاروباری ئەڵمانیا: پەکەکە کاری نایاسایی زۆری کردووە و بڕیارەکەی پۆلیسی ئەڵمانیا تەواو یاساییە
