بەڕێوەبەری ئەوقافی سۆران: سەرۆكی حكوومەت چەندین جار دیاریی پێشكەش بە مامۆستایانی ئایینیی خۆبەخش كردووە

بەڕێوەبەری ئەوقافی ئیدارەی سۆران دەڵێت، لە سنوورەكەمان زیاتر لە 145 مامۆستای ئایینیی خۆبەخش لە مزگەوتەكان هەن، تا ئێستا چەندین جار سەرۆكی حكوومەتی هەرێمی كوردستان لە ڕێگەی وەزیری ئەوقاف و كاروباری ئایینییە دیاریی پێشكەش كردوون. د. پشتیوان سرێشمەیی، بەڕێوەبەری ئەوقافی سۆران، بە (باسنیوز)ی ڕاگەیاند: ”سنووری بەڕێوەبەرایەتیمان سەرجەم شار و شارۆچكە و گوندەكانی سنووری ئیدارەی سەربەخۆی سۆران لەخۆ دەگرێت و لە زۆربەی قەزاكان تێبینەرایەتیی سەر بە بەڕێوەبەرایەتیمان كراوەنەتەوە و 145 مامۆستای ئایینی كە پێك هاتوون لە پێشنوێژ و وتارخوێن لە مزگەوتەكانی ئەم سنوورانە بە شێوەی خۆبەخشانە خزمەت دەكەن.” بەڕێوەبەری ئەوقافی سۆران ئاشكراشی دەكات: “خۆشبەختانە تا ئێستا چەند جار لە ڕێگەی وەزیری ئەوقاف و كاروباری ئایینی و لەلایەن مەسرور بارزانی، سەرۆكی حكوومەتی هەرێمی كوردستانەوە دیارییان پێشكەش كراوە”.