ئەمڕۆ چوارشەممە 22/11/2023، هەڵبژاردنی پێشوەختە لە هۆڵەندا دەستی پێ کرد و ئەگەرێکی زۆر هەیە ژنێکی کورد ببێتە سەرۆک وەزیرانی ئەو وڵاتە.
هەڵبژاردنی پەرلەمانی هۆڵەندا ئەمڕۆ کاتژمێر ٠٦:٠٠ی بەیانی بە کاتی هۆڵەندا دەستی پێ کرد و پڕۆسەی دەنگدان تا کاتژمێر ٠٩:٠٠ی ئێوارە بەردەوام دەبێت.
پەرلەمانی هۆڵەندا لە ١٥٠ کورسی پێک دێت و هەزار و 128 کاندید له 26 پارت و هاوپەیمانیی جیاواز لەسەر کورسییەکانی پەرلەمان کێبڕکێ دەکەن. لە هۆڵەندا زیاتر لە ١٣ ملیۆن کەس مافی دەنگدانیان هەیە.
هەر پارتێک بیەوێت زۆرینە بێت، پێویستە 76 کورسی بەدەست بهێنێت، بەڵام ئەمە کارێکی قورسە و بۆ پێکهێنانی حکوومەت دەبێ هاوپەیمانی پێک بهێنرێت.
چوار پارت و هاوپەیمانیی بەهێز لە هۆڵەندا هەن کە بریتین لە پارتی گەل بۆ دیموکراسی و ئازادی (VVD) بە سەرۆکایەتیی دیلان یەشیلگۆز، پارتی دیموکرات- 66 بە سەرۆکایەتیی ڕۆب جێتن، پارتی سەوز و کرێکاران بە سەرۆکایەتیی فرانس تیمەرمەن و پارتی ئازادی بە سەرۆکایەتیی هێرت ویڵدێرس.
ئێستا هەموو چاوەکان لەسەر پارتی (VVD)یە کە ژنێکی کورد بە ناوی دیلان یەشیلگۆز سەرۆکایەتیی دەکات. پێشبینی دەکرێت ئەو خانمە ببێتە سەرۆک وەزیرانی داهاتووی هۆڵەندا.
دیلان یەشیلگۆز بە ڕەچەڵەک خەڵکی شاری دێرسیمی باکووری کوردستانە. ساڵی ١٩٧٧ لە ئەنقەرە لەدایک بووە و ساڵی ١٩٨٤ لەگەڵ بنەماڵەکەی ڕوویان لە هۆڵەندا کردووە.
دیلان یەشیلگۆز لە مانگی ئازاری ٢٠١٧-وە ئەندامی پارتی (VVD) بووە و ئێستا وەزیری ئاسایش و دادی هۆڵەندایە.