لە سۆران ١٨ پزیشک و کارمەندی تەندروستی تووشی ڤایرۆسی کۆرۆنا بوونە

بە هۆی بەركەوتنیان لەگەڵ تووشبووانی ڤایرۆسی کۆرۆنا لە کاتی چارەسەرکردنیان،١٨ پزیشک و کارمەندی تەندروستیی لە شاری سۆران تووشی ڤایرۆسی کۆرۆنا بوونە. بەختیار یوسف، گوتەبێژی نەخۆشخانەی گشتیی ئاشتیی سۆران، بە (باسنیوز)ی راگەیاند: “بەهۆی بەركەوتنیان لەگەڵ نەخۆشدا، تەنیا لە ماوەی دوو هەفتەدا ١٨ پزیشك و كارمەند لە بەشە جیاوازەكانی نەخۆشخانەی ئاشتی تووشی ڤایرۆسی كۆڕۆنا بوونە، بۆیە داوا لە نەخۆش و هاووڵاتیان دەكەین، ئەگەر زۆر پێویست نەبێت سەردانی نەخۆشخانە نەكەن، هەروەها تەنیا یەك كەس لەگەڵ نەخۆش سەردانی پزیشك بكات بۆ پاراستنی گیانی خۆیان و نەخۆش و دەوروبەر”. گوتیشی: “ئەوانەی سەردانی نەخۆشخانەكەمان دەكەن، پێویستە ماسك و دەستكێش و پێدوایستی خۆپارێزی بەكاربهێنن، لەگەڵ ئەوەشدا نەخۆش لە نزیكترین بنكە نووسراو بهێنێت بۆ بەشە راوێژكارییەكانی نەخۆشخانەی ئاشتی”. گوتیشی: “گرتنەبەری رێنمایە تەندروستییەكان و دروستنەكردنی قەرەباڵغی دەبێتە هۆی كەمكردنەوەی ژمارەی تووشبوون بە ڤایرۆسی كۆرۆنا”.