سەرۆکی هەواڵگریی ئیسرائیل سەردانی ئیمارات دەکات

سەرۆکی دەزگای هەواڵگریی ئیسرائیل (مۆساد) سەردانی ئەبوزەبیی پایتەختی ئیماراتی عەرەبیی یەکگرتوو دەکات. بەپێی هەواڵی میدیا ئیسرائیلییەکان، ئەمڕۆ یەکشەممە 16-8-2020، یوسی کۆهین، سەرۆکی مۆساد سەردانی ئەبوزەبی دەکات و لەگەڵ محەمەد بن زاید، شازادەی جێنشینی ئیمارەتی ئەبوزەبی و جێگری فەرماندەی گشتیی هێزە چەکدارەکانی ئیمارات، کۆ دەبێتەوە. یوسی کۆهین و محەمەد بن زاید تاوتوێی ئامادەکارییەکان بۆ رێوڕەسمی واژۆکردنی رێککەوتنی ئیمارات و ئیسرائیل دەکەن. بەپێی زانیارییەکان، بڕیارە لە سەرەتای مانگی داهاتوو (مانگی 9ـی 2020)، لە واشنتنی پایتەختی ئەمریکا و بە چاودێریی دۆناڵد ترەمپی سەرۆکی ئەمریکا، رێککەوتنی ئیمارات و ئیسرائیل واژۆ بکرێ.