دوو کەس کە بە نایاسایی نەوتی کەرکووکیان دەبرد بۆ بەغدا دەستگیرکران

بەرێوەبەری پۆلیسی نەوتی باكوور لە سنووری پارێزگای كەركووک، دەستگیركردنی دوو شۆفێری راگەیاند، كە بەشێوەی نایاسایی لە كەركووكەوە نەوتیان بۆ بەغدا گواستووەتەوە. عەمید محەمەد تاهیر، بەرێوەبەری بەرێوەبەرایەتی پۆلیسی نەوتی باكوور لە سنووری پارێزگای كەركووك، بە (باسنیوز)ی راگەیاند: “ڕۆژی سێشەممە 18/8/2020، لە نێوان پارێزگای كەركووك و دیالە ،هێزەکانمان دوو شۆفێریان بە تانكەرەكانیانەوە دەستگیرکرد كە نەوتیان بە شێوەیەكی نایاسایی لەكەرکووكەوە بۆ بەغدا دەگواستەوە”. گوتیشی: “هەر كۆمپانیایەكی نەوت كە نەوت یان هەر جۆرە سووتەمەنییەكی تر دەگوازێتەوە دەبێت مۆڵەتی فەرمیی پۆلیسی نەوتی باكوور یان لایەنە ئەمنییەكانی هەبێت، بە پێچەوانەوە بەپێی یاسای ژمارە 14ی ساڵی 2008 مامەڵەی یاسایی لەگەڵ دەكەین كە تایبەتە بە گواستنەوەی نەوت بە شێوەی نایاسایی”.