دوو گوللە هاوەن لە نێو شاری خانەقین کەوتنە خوارەوە

ئەمشەو لە دوو شوێنی جیاوازەوە دوو گوللە هاوەن ئاراستەی نێو شاری خانەقین کرا. عەمید ئازاد عیسا، بەرێوەبەری پۆلیسی خانەقین(هەرێمی کوردستان)، بە (باسنیوز)ی راگەیاند: “ئەمشەو شەممە 22/8/2020، لە دوو ئاراستەی جیاوازەوە دوو گوللە هاوەن ئاراستەی ناوەندی قەزای خانەقین کران”. گوتیشی: “یەکێک لە گوللە هاوەنەکان بەر ماڵی برایەکی بەڕێوەبەری پۆلیسی خانەقین(عێراق) کەوتووە و زیان بەر خانووەکە کەوتووە و ئەوی دیکەش لە نێو باخچەیەکی خانەقین کەوتووەتە خوارەوە”. ئاماژەی بە ئەوەش کرد کە بە هۆی ئەو بۆردوومانەوە بەشێکی زۆری دانیشتووانی خانەقین ئێستا لە ترس و دڵەڕاوکێدان و ترسیان لە دووبارەبوونەوەی بۆردوومانەکە هەیە.