رێڤه‌به‌رێ به‌نكا خوینێ ل دهۆكێ دیاركركو هه‌تا نۆكه 15 تووشبوویێن كۆرۆنایێ یێن چاره‌سه‌ربووین، پلازما خوینێ پێشكێشى تووشبوویان كریه. عادل عەبدولسەلام، رێڤه‌به‌رێ به‌نكا خوینێ ل دهۆكێ بۆ (باسنیوز) دیاركركو: “ده‌ست وه‌رگرتنا پلازما خوینێ هاتیه كرن بۆ تووشبوویێن كۆرۆنایێ ل پارێزگه‌ها دهۆكێ. هه‌تا نۆكه 15 كه‌سین ژ كۆرۆنایێ چاره‌سه‌ربووین قه‌ستا به‌نكا خۆینێ كرینه بۆ دانا پلازما خوینێ هاتیه پێشكێشكرن بۆ تووشبوویێن پێدڤى پێ هه‌ى. ئه‌م داخوازێ ژ وان هه‌موو كه‌سان دكه‌ین یێن تووشى كۆرۆنایێ بووین هاتینه چاره‌سه‌ركرن قه‌ستا به‌نكا خوینێ بكه‌ن بۆ دانا پلازما خوینێ”. حه‌مزه ره‌زیكى، به‌رپرسێ راگه‌هاندنێ ل رێڤه‌به‌ریا گشتى یا ساخله‌میا پارێزگه‌ها دهۆكێ بۆ (باسنیوز) دیاركركو: “بۆ چار تووشبوویێن كۆرۆنایێ ل دهۆكێ پلازما خوینێ هاته دان بۆ تووشبوویێن كۆرۆنایێ ب مه‌ره‌ما چاره‌سه‌ریێ وه‌كو به‌رگیریێ بۆ تووشبوویان دهێته بكارئێنان. هه‌ر نەخۆشەكی كۆرۆنایێ 14 رۆژان پشتى كو باش بوو، هینگێ دشێت پشكنینا خۆ ئه‌نجام بده‌ت وپلازما خوینا خۆ بۆ چاره‌سه‌ركرنا تووشبوویێن كۆرۆنایێ پێشكێش بكه‌ت. نۆكه ده‌ست ب چاره‌سه‌ركرنا تووشبوویێن كۆرۆنایێ ب رێیا پلازما خوینێ هاته كرن”. ل پارێزگه‌ها دهۆكێ هه‌تا نۆكه زێده‌تر ژ سێ هزار كه‌سان تووشێ كۆرۆنایێ بووینه. ژوانا ژى 942 تووشبوویێ یێن هاتینه چاره‌سه‌ركرن و 31 تووشبوویان گیانێ خۆ ژ ده‌ستداینه. نۆكه زێده‌تر ژ دوو هزار و 350 تووشبوویان لژێر چاره‌ه‌سه‌ریێ نه.
ل دهۆكێ ده‌ست ب چاره‌سه‌ركرنا تووشبوویێن كۆرۆنایێ ب رێیا پلازما خوینێ هاته كرن
