ئیمارات پەیامێک لە دژی تورکیا بۆ ئەنجوومەنی ئاسایشی نێودەوڵەتی دەنێرێت

ئیماراتی عەرەبیی یەکگرتوو پەیامێک لە دژی تورکیا، بۆ ئەنجوومەنی ئاسایشی نێودەوڵەتی دەنێرێت. لە پەیامەکەیدا، کە مانگی رابردوو گەیەندراوەتە ئەنجوومەنی ئاسایشی نێودەوڵەتی و ئەمڕۆ شەممە 29-8-2020 میدیا عەرەبییەکان ناوەڕۆکەکەیان بڵاو کردووەتەوە، ئیمارات رایگەیاندووە، تورکیا هەوڵی تێکدانی سەقامگیریی رۆژهەڵاتی ناوەڕاست و دەریای ناوەڕاست دەدات. هەر لە پەیامەکەدا، دەوڵەتی ئیمارات جەختی لەوە کردووەتەوە، کە تورکیا کەیسی پەنابەران و دەستوەردان لە کاروباری ناوخۆی سووریا بۆ بەرژەوەندیی سیاسەتەکانی خۆی بەکار دەهێنێت. پەیامەکەی ئیمارات بۆ ئەنجوومەنی ئاسایشی نێودەوڵەتی دوای پەیامێکی تورکیا دێت، کە بۆ ئەنجوومەنەکەی ناردبوو و تێیدا رایگەیاندبوو، ئیمارات هەوڵی لەناوبردنی بزووتنەوە و لایەنە دیموکراتەکانی ناوچەکە دەدات. ناکۆکییەکانی ئەو دوو وڵاتە پەیوەندیی بە رەوتی ئیخوان موسلیمینی جیهانییەوە هەیە، کە تورکیا لەسەردەمی حوکمڕانیی پارتی داد و گەشەپێدان (ئاکەپە)ـە و رەجەب تەییب ئەردۆغانی سەرکۆمار و سەرۆکی ئەو پارتە، خۆی بە رێبەری ئەو رەوتە دادەنێت و ئیماراتیش ئەو رەوتەی خستووەتە ناو لیستی رێکخراوە تیرۆریستییەکان.