تیمی پزیشکی: تا ئێستا ترەمپ قۆناغە مەترسیدارەکەی کۆرۆنای تێنەپەڕاندووە

پزیشکی تایبەتیی سەرۆکی ئەمریکا رایدەگەیەنێت، تا ئێستا سەرۆک قۆناغە مەترسیدارەکەی پەتای کۆرۆنای تێنەپەڕاندووە. رۆژی هەینی 2-10-2020، دۆناڵد ترەمپ لە هەژماری تایبەتیی خۆی لە تۆڕی کۆمەڵایەتیی (تویتەر)، تووشبوونی خۆی و میلانیای هاوسەری بە پەتای کۆرۆنا، راگەیاند. شۆن کۆنلی، پزیشکی تایبەت و سەرۆکی تیمی پزیشکیی چارەسەرکاری دۆناڵد ترەمپی سەرۆکی ئەمریکا، رایگەیاندووە، ترەمپ لە رۆژی شەممەدا زۆربەی کاتەکەی بە کارکردنی ئاسایی خۆی لە نەخۆشخانەی واڵتەر رید بەسەر برد. شۆن کۆنلی هەروەها رایگەیاندووە، دۆناڵد ترەمپ (تا)ی نەگرتووە و لە رەوشێکی تەندروستیی باش دایە، بەڵام هێشتا قۆناغە مەترسیدارەکەی تێنەپەڕاندووە. دوای تووشبوونی بە پەتای کۆرۆنا، ترەمپ لەسەر داوای پزیشکی تایبەتیی خۆی گوازرایەوە نەخۆشخانەی سەربازیی واڵتەر رید، بۆ ئەوەی چەند رۆژێک لەوێ بخەوێندرێت.