ھەفتەی داھاتوو پەرلەمانی عێراق تاووتوێی پڕۆژە یاسای بودجەی ٢٠٢١ دەکات

پەرلەمانتارێکی کوردی پەرلەمانی عێراق ڕایگەیاند کە بڕیارە ھەفتەی داھاتوو ئەنجوومەنی نوێنەرانی عێراق بۆ تاووتوێکردنی پڕۆژە یاسای بودجەی ساڵی ٢٠٢١ی عێراق کۆببێتەوە و تێپەڕاندنی پڕۆژەکەش مانگێکی پیویستە. شێروان میرزا، پەرلەمانتاری کورد لە ئەنجوومەنی نوێنەرانی عێراق بە (باسنیوز)ی ڕاگەیاند: “بەپێی ئەو پڕۆژە یاسایەی کە گەیشتووەتە دەستمان بودجەی ئەمساڵی عێراق بڕەکەی ١٦٤ تریلیۆن دینارە کە نرخی بەرمیلێک نەوت بە ٤٢ دۆلار و نرخی یەک دۆلاریش بە ١٤٥٠ دینار دیاری کراوە ،ھاوکات بڕی کورتھێنانی بودجەی ئەمساڵ ٧١ تریلیۆن دینارە”. گوتیشی: “بڕیارە ھەفتەی داھاتوو ئەنجوومەنی نوێنەرانی عێراق کۆببێتەوە بۆ تاووتوێکردنی پڕۆژە یاسای بودجە و دوای ئەویش لە ماوەی چوار ڕۆژدا خوێندنەوەی یەکەم و دووەمی بۆ دەکرێت،دواتر لەماوەی مانگێکدا وردەکارییەکانی تەواو دەکرێت و پەسند دەکرێت”. سەبارەت بە پشکی کورد وەک لە پڕۆژە یاساکەدا دیاریکراوە، شێروان میرزا گوتی: “لە پڕۆژە یاساکەدا پشکی کورد دیاری کراوە بەڵام دەنگدان لەسەری لەلایەن زۆرینەی پەرلەمانتارانەوە ھەندێک قورسە و وردەکاری و کاری پێشوەختەی پێویستە کە ھیوادارین ئەو گرفتە نەیەتە پێشەوە”.