ئیسرائیل بارەگایەکی میلیشیا ئێرانییەکان لە سووریا بۆردومان دەکات

سوپای ئیسرائیل بارەگای چەکدارانی سوپای رژێمی سووریا و میلیشیا ئێرانییەکان لە باشووری سووریا، بۆردومان دەکات. میدیاکانی رژێمی سووریا بڵاویان کردووەتەوە، کە درەنگانی شەوی چوارشەممە 3-2-2021، سوپای ئیسرائیل بە مووشەک بنکەیەکی سەربازی لە پارێزگای قونەیترە لە باشووری سووریا،کردووەتە ئامانج. هەروەک ئەو میدیایانە باسی دەکەن، بنکە سەربازییەکە سەر بە سوپای رژێمی سووریا و میلیشیا ئێرانییەکان بووە. ئێران لە سەرەتای شەڕی ناوخۆیی سووریاوە، کە لە مانگی ئاداری 2011 دەستی پێکردووە، بە ناردنی چەک و چەکدار پاڵپشتیی رژێمی سووریا دەکات. سوپای ئیسرائیل بەردەوام بنکە و کاروانە چەکدارییەکانی میلیشیا ئێرانییەکان لە سووریا دەکاتە ئامانج.