كۆنگرە كێشە نێوخۆییەكانی كۆمەڵی ئیسلامی ئاڵۆزتر دەكات

وابڕیارە ناوەڕاستی ئەم مانگە کۆمەڵی ئیسلامی کۆنگرە ببەستێت و توێژەرێکی ئیسلامی سیاسیش پێیوایە گۆڕانکاری جەوهەری لە کۆنگرەی کۆمەڵ روونادات، مامۆستا عەلی باپیر لە شوێنەکەی دەمێنێتەوە و رەنگە چەند ئەندامێکی سەرکردایەتی بگۆڕدرێت. وابڕیارە کۆمەڵی ئیسلامیی کوردستان 18ـی ئەم مانگە کۆنگرەی چوارەمی خۆی لە تاسڵوجە پێشانگای نێودەوڵەتی سلێمانی ببەستێت و 19ـی مانگ کۆتا رۆژی کۆنگرەکە بێت. بەپێی زانیاریەکانی (باسنیوز)، لەم دۆخەی ئێستا کۆمەڵی ئیسلامی کە کۆنگرە دەبەستێت، لەناوخۆیدا دووچاری کۆمەڵێک گرفت و ئاستەنگ بووەتەوە، کە هەندێ لە ئەندامانی سەرکردایەتی پێیانوایە کۆنگرە کێشەکانی حزب ئاڵۆزتر دەکات و هەندێکی دیکەشیان پێیانوایە چارەسەر دەبن.هەر بەپێی زانیاریەکان، کێشەی سەرەکی ئێستای کۆمەڵی ئیسلامی پەیوەندی بە شارچیەتی و پەراوێزخستنی مەڵبەندی هەولێرەوە هەیە، بەشێوەیەک ئەنجامدانی کۆنگرەش لە سلێمانی هەر بۆ پەراوێزخستنی سەرکردایەتی کۆمەڵە لە شاری هەولێر.هاوکات، بەشێک لە ئەندامانی سەرکردایەتی و قاعیدەی کۆمەڵی ئیسلامی لەگەڵ ئەوەدانین مامۆستا عەلی باپیر و کەسانی نزیک لەو ببنەوە بە ئەمیر و سەرکردایەتی کۆمەڵی ئیسلامی کۆنتڕۆڵ بکەنەوە. سۆران سێوکانی، توێژەری ئیسلامی سیاسی، بۆ (باسنیوز) ڕای گەیاند، ئەوان پێیانوانیە گۆڕانکاری جەوهەری لە کۆنگرەی کۆمەڵدا ڕووبدات، گووتیشی “ئەمیری کۆمەڵ هەر وەكو خۆی دەمێنێتەوە و ناو شێوازی کارکردنیان هەر وەكو خۆی دەبێت و دەشێت هەندێک لەئەندامانی سەرکردایەتی گۆڕانی بەسەردا بێت، ئەوە کۆنگرەی کۆمەڵی ئیسلامی دەبێت”. بەڵام، فارووق عەلی، ئەندامی سەرکردایەتیی کۆمەڵی ئیسلامیی کوردستان، بۆ (باسنیوز) ڕای گەیاند، کۆنگرە باڵاترین دەسەڵاتە و ئەگەری هەر گۆڕانکاریەک هەیە، چ لە پەیڕەو پڕۆگرام بێت، یان پرسی گۆڕینی ناو حزب و لێکردنەوەی پاشگری ئیسلامی، بەڵام ئەو پرسانە لە کۆنفرانسەکانی کۆمەڵ باسکراون و لە چوارچێوەی ئەو پڕۆگرامانەشی کە ئامادەکراون هەر پرسێک لەوانە قابیلی ئەوەیە لە کۆنگرە بخرێنە بەر باسەوە، بەڵام پرسی لادانی پاشگری ئیسلامی لە کۆنفرانسەکان هێندە جێگەی بایەخ نەبووە، گووتیشی “تاوەکو ئێستا هیچ کەس بۆ پۆستی ئەمیری کۆمەڵی ئیسلامی بە مامۆستا عەلی باپیریشەوە خۆی کاندید نەکردوە، بەگشتی سەرکردایەتی و قاعیدەی کۆمەڵ بەبێ رکابەر لەگەڵ ئەوەدان مامۆستا عەلی باپیر ببێتەوە بە ئەمیری کۆمەڵی ئیسلامی، بەڵام خۆی لەگەڵ ئەوەدانیە و تەکلیفی سەرکردایەتی و خوارەوەی بەسەرەوەیە بۆ جارێکی دیکە ئەو پۆستە وەربگرێتەوە”