پەرلەمانتارێکی لیژنەی پەروەردە: ئەمساڵ کێشەی کەمیی کتێب لە قوتابخانەکان نییە

پەرلەمانتارێکی لیژنەی پەروەردە دەڵێ هەرچەندە ئەمساڵ هیچ کتێبێکی پڕۆگرامی خوێندن چاپ نەکراوە بەڵام هیچ کێشەیەکی کەمیی کتێب لە قوتابخانەکان نییە. د. زێدان برادۆستی، ئەندامی لیژنەی پەروەردە و خوێندنی باڵا و فراکسێۆنی پارتی لە پەرلەمانی کوردستان، بە (باسنیوز) ی راگەیاند: “بەھۆی بڵاوبوونەوەی پەتای کۆرۆناوە ئەمساڵ نەتوانراوە ھیچ کتێبێک چاپ بکرێت، بەڵام توانراوە کێشەی کەمی و نەبوونی کتێب لە قوتابخانەکاندا چارەسەر بکرێت، بەتایبەت بە ھۆی ئەوەی کتێبەکان زۆر بەکار نەھاتوون و نوێن بەھۆی ئەوەی نەتوانراوە پرۆگرامی خوێندن تەواو بکرێت”. روونیشیکردەوە: “لە ھەرێمی کوردستان یەک ملیۆن و ٧٠٠ ھەزار قوتابیمان ھەیە و ھەر قوتابییەکیش ھەشت کتێبی ھەیە، بەشێک لە بابەتەکانیشمان دوو بەشیان ھەیە کە ئەمەش ژمارەی کتێبەکان زیاد دەکات، بەڵام بۆ ئەمساڵ بە گشتی ھیچ کێشەیەکمان نەبووە لە دابەشکردنی کتێبدا و قوتابیانیش ھیچ داواکارییەکی لەم شێوەیان نەبووە، ئێمەش راستەوخۆ چاودێریی بارودۆخ و کێشەی قوتابیان دەکەین”. ناوبراو ئەوەشی خستەڕوو: “تائێستا هیچ بڕیارێک بۆ کەمکردنەوەی پرۆگرامی خوێندن نییە، چونکە دیار نییە کە دۆخی تەندروستی بە کوێ دەگات، بەڵام لە ئەگەری گۆڕان لە دۆخی تەندروستیدا بڕیاری نوێ لەمبارەیەوە دەدرێت”.