چەکدارانی سەر بە رژێمی سووریا رێککەوتنی ئاگربەست لە قامیشلۆ پێشێل دەکەن

چەکدارانی میلیشیای بەرگریی نیشتمانیی سەر بە رژێمی سووریا رێککەوتنی ئاگربەست لە قامیشلۆ، پێشێل دەکەن. ئێوارەی رۆژی یەکشەممە 25-4-2021، بە چاودێریی هێزەکانی سووریای دیموکراتی (هەسەدە) و هێزەکانی سوپای رووسیا، ئاسایشی سەر بە پارتی یەکێتیی دیموکراتی (پەیەدە) و میلیشیای بەرگریی نیشتمانی لە قامیشلۆ، رێککەوتن لەسەر راگەیاندنی ئاگربەست. دوای دوو کاتژمێر لە رێککەوتنەکە، میلیشیای بەرگریی نیشتمانی رێککەوتنەکەی پێشێل کردووە و هێرشی کردووەتە سەر بازگەکانی ئاسایشی پەیەدە لە گەڕەکەکانی تەی و حەلکۆ لە قامیشلۆ. بەندەکانی رێککەوتنەکە: – هێزەکانی ئاسایشی پەیەدە لەو ناوچانە دەمێننەوە، کە لە کاتی شەڕەکاندا دەستیان بەسەردا گرتووە. – چەکدارانی بەرگریی نیشتمانی لەناو گەڕەکەکان دەکشێنەوە و نزیک هێزەکانی ئاسایشی پەیەدە ناکەونەوە. – لە رۆژی دووشەممە (ئەمڕۆ)ـەوە رێگا بە گەڕانەوەی ئاوارەکان دەدرێت. – دەوریەی هاوبەشی سەربازیی رووسی و ئاسایشی پەیەدە لەناو گەڕەکەکان دەسوڕێنەوە. شەڕەکە دوای دەستگیرکردنی ژمارەیەک چەکداری میلیشیای بەرگریی نیشتمانیی سەر بە رژێمی سووریا لەلایەن ئاسایشی پەیەدەوە لە بازگەیەکی قامیشلۆ لە رۆژی سێشەممە 20-4-2021 دروست بووە و تا ئێستاش بە پچڕ پچڕی بەردەوامە.