ئێڤاریا رۆژا ئێكشه‌مبى 20/6/2021 ب ئاماده‌بونا نێچیرڤان بارزانی سەرۆکێ هەرێما کوردستانێ و مه‌سرۆر بارزانى، سه‌رۆكێ حكۆمه‌تا هه‌رێما كۆردستانێ و چه‌ندین به‌رپرسێن دیتر یێن هه‌رێم و ژ ده‌رڤه‌ى هه‌رێما كۆردستانێ، رێوره‌سمێن ئاهه‌نگا ده‌رچوونا قۆتابیێن زانكۆیا ئه‌مریكى یا كۆردستانێ برێڤه چوون و 18 كۆر و كچێن شه‌هیدان و 7 كۆر و كچێن زیندانییێن سیاسى باوه‌رنامه ل زانكۆیا ناڤبرى وه‌رگرت. ژیان مسته‌فا، رێڤه‌به‌را كارۆبارێن شه‌هید و ئه‌نفالكریان ل دهۆكێ بۆ (باسنیوز) دیاركر: “ئه‌م به‌رده‌وام دخزمه‌تا زارۆكێن شه‌هید و ئه‌نفالكریان داینه و هه‌ر كۆر و كچه‌كا شه‌هیدى كۆ ل چ زانكۆیێن دیتر نه‌خواند بیت و باوه‌رنامه وه‌رنه‌گرت بیت، ماف هه‌یه سه‌ره‌دانا مه بكه‌ت بۆ وه‌رگرتنا په‌سه‌ندا رێڤه‌به‌ریا مه بۆ پێشكێشكرنێ بۆ خواندنا زانكۆیا ئه‌مریكى یا كۆردستانێ”. گۆت ژى: “بۆ وه‌رزێ خواندنا 2020-2021 رێڤه‌به‌ریا مه په‌سه‌ند پێشكێشى 150 كۆر و كچێن شه‌هیدان كریه بۆ وێ چه‌ندێ پێشكێشى زانكۆیا ئه‌مریكى یا كۆردستانێ بكه‌ن بۆ وه‌رگرتن و بده‌ستڤه‌هاتنا خواندنا زانكۆیا ناڤبرى، هه‌لبه‌ت هه‌ر كۆر و كچه‌كا شه‌هیدى به‌رى نها ل چ زانكۆیا نه‌هاتبیته وه‌رگرتن دشێت ژلایێ مه ڤه په‌سه‌ندێ وه‌ربگریت بۆ وێ چه‌ندێ بشێت ل زانكۆیا ئه‌مریكى یا كۆردستانێ به‌رده‌وامیێ بده‌ته خواندنێ”. لدیڤ پێزانینێن (باسنیوز) 18 كۆر و كچێن شه‌هیدان و 7 كۆر و كچێن زیندانیێن سیاسى ئه‌ڤرۆ ل زانكۆیا ئه‌مریكى یا كۆردستانێ باوه‌رنامه وه‌رگرت و ژ زانكۆیا ناڤبرى دوماهى ب پرۆسێسا قۆناغا زانكۆیێ ئینا.
18 كۆر و كچێن شه‌هیدان ل زانكۆیا ئه‌مریكى یا كۆردستانێ باوه‌رنامه وه‌رگرت
