لە كەركووك بەهۆی ڕووداوێكی هاتوچۆوە هاووڵاتییەك گیانی لەدەست دا

لە شاری كەركووك، لە ئەنجامی ڕووداوێكی هاتوچۆ، شۆفێری ماتۆڕسكیلێك گیانی لەدەستدا. عەقید فەرهاد دووشیوانی، بەڕێوەبەری بنكەی پۆلیسی ڕەحیماوای شاری كەركووك، بە (باسنیوز)ی ڕاگەیاند: “دوای نیوەڕۆی ئەمڕۆ سێشەممە 24/8/2021، لە گەڕەكی شۆراوی شاری كەركووك، بە دیاریكراوی لە نزیك هۆڵی لایف سیتی، ماتۆڕسكیلێك بەتوندی خۆی بە ئۆتۆمبێلێكی بارهەڵگردا دەكێشێت و لە ئەنجامدا دەست بەجێ شۆفێری ماتۆڕسكیلەكە گیان لەدەست دەدات”. هەروەها ئەوەشی خستە روو، “هێلكاری بۆ ڕووداوەكە كرا و هۆكارەكەی خرایە ئەستۆی شۆفێری ماتۆڕسكیلەكە”. ئاماژەشی بەوەدا، قوربانییەكە خەڵكی شاری خورماتووە و دانیشتوووی گەڕەكی پەنجاعەلی شاری كەركووكە و شۆفێری ئۆتۆمبێلەكەش دوای ڕووداوەكە خۆی ڕادەستی هێزەكانی پۆلیس كرد.