وەزارەتی كارەبا لە رێگەی پۆرتاڵێکەوە راستەوخۆ وەڵامی هاووڵاتییان دەداتەوە

وەزارەتی كارەبای حکوومەتی هەرێمی لە رێگەی (پۆرتاڵی خزمەتگوزاریی سكاڵای ئەلكترۆنی) راستەوخۆ وەڵامی سكاڵای هاووڵاتییان دەداتەوە. پەیجی فەرمی وەزارەتی کارەبا لە هەژماری فەرمی خۆی لە تۆڕی کۆمەڵایەتیی (فەیبسووک) بڵاویکردووەتەوە: “لەسەر راسپاردەی وەزیری كارەبا بۆ بەدواداچوون و وەڵامدانەوەی خێرای سكاڵای هاووڵاتییان پۆرتاڵی خزمەتگوزاریی سكاڵای ئەلكترۆنی بەگەڕ خرا”. ئەوەش خراوەتە روو: “هاووڵاتییان دەتوانن راستەوخۆ سكاڵا و داواكارییەكانیان لەرێگەی پۆرتاڵی خزمەتگوزاریی سكاڵای ئەلكترۆنی بنێرن و لەلایەن نووسینگەی وەزیر و بەڕێوەبەرایەتیی گشتی دیوانی وەزارەتەوە بەدواداچوونی بۆ دەكرێت و لەماوەیەكی كەمدا وەڵامیان دەدرێنەوە”. ئاماژە بەوەش کراوە کە هاووڵاتییان دەتوانن لە ڕێگەی ئەم لینکەوە http://skala.moel.gov.krd/ سکاڵا و داواکارییەکانیان بۆ نووسینگەی وەزیر و بەڕێوەبەرایەتیی گشتیی دیوان بنێرن.